|
Campagnete
Trieste la finiva in via Setefontane,
e andando un poco fora
no iera anima viva,
come de inverno a Bane in un giorno de bora.
Le case popolari iera solo in Ponziana,
tute quante col orto e i fondi meno cari
in via Rugero Mana.
Papà iera zà morto
rente dei Campi Elisi andove adesso i disi
che xe case de siori,
ma lu fazeva bori
portando via i cavai del Campo dei soldai.
Mi me lo vedo ancora scampar coi Lipizzani
e col revolver fora un Ober dei ulani
che ghe zigava ofese
in gnoco e in ungherese.
Che tempi, che ridade, che bele campagnete:
galine per le strade, scoi contro le mulete
e in via Molin a Vento i cari de formento.
Adesso xe cambiado: xe pien de case nove
e quando che ghe vado, se no domando aiuto
no so gnanca per dove
se torna in Istituto. |
Addio,
sante memorie
Co' ierimo putei, stavimo in via Donota
e mi coi mii fradei se andava gambe in spale
quando mia nona zota, per sparagnar le scale
la ne diseva: «Ale, andè a comprar fasioi
osso de carne cota, dò cròdighe e capussi
che ve fasso una jota».
Cussi noi quatro fioi corendo come mussi
se andava zò per Rena
sburtando le putele,
su per Riborgo e atorno per via Punta del Forno
e andando zò de riva
per la via San Michele,
dove in Coperativa, in mezo dela gente
rambavo caramele
senza che i vedi gnente, tanto la iera piena.
Po' in piazza Barbacan - zà squasi ora de zena -
in botega del pan
compravo un tiramola robando un carantan
sul vin e la zivola.
Che tempi, che ridade!
Le go ancora in orecia e in ocio le contrade
de la mia Zitavecia, quando tra muro e muro,
tra una corte e un'androna, iera tuto un sussuro,
tuto un zigarse mona, un bon odor de frito
e un far l'amor in zito. |
I
sottomarmo
Co' ierimo putei, de festa vestì in nero
con mama e mii fradei andavo in zimitero
col tran numero uno
insieme con zio Bruno.
Lo spetavimo rente del vecio ospedaleto,
po', sconti tra la gente per no pagar bilieto
gnanca el giorno dei Morti,
stavimo con el naso fracà contro del vetro
pronti a smontar nel caso che i se fussi inacorti
che passavimo el metro.
Saltai del predelin, corevimo de briva
se el controlor vigniva dela porta de drio.
Mama del finestrin
perdendo un grisantemo,
zigava: «Se vedemo sula tomba de zio!».
Che tempi, che ridade, per no pagar dò fliche;
dò corse sparagnade e in scarsela tre ciche,
un gheto e una scalmana
fin drento de Sant'Ana.
Zio Bruno col stagnaco, cambiando l'acqua ai fiori
me mostrava le tombe:
el pare de Pitaco, i loculi dei siori,
quei mazzai dele bombe e, drio de dò cancelli
Scipione Sandrinelli.
Portavimo lumini anche sul colombario
dove vizin zio Nini morto sbrovà sul «Diana#&187;
del'Austro-Americana,
ghe iera nono Mario finido soto piera
cola pension de guera
per 'ver bevudo tropo e portà in leto el s'ciopo. |
K.
und K.
Co' ierimo putei e i meteva l'aviso
che a Viena i ga deciso de levar i soldai,
i mii quatro fradei,
mati coli che mai,
i se ficava in leto per no andar al Distreto.
Papà iera zà morto,
fusilà nela schena
quando i se ga inacorto che el iera spia rumena
e mi per 'sta maroca, me go fissà, 'sto impegno:
«Meo cusirse la boca che el capoto de legno»
co' in Bosnia-Erzegovina iero soldà in Marina.
Che tempi, che ridade, che gamele de jota,
che gheto per le strade e che ganghe in tradota!
Anca adesso co' bevo penso ala Kaiserschule
e a quei tochi de mule che iera a Sarajevo.
El sabo iera el soldo
e mi del regimento Imperator Leopoldo
de stanza a Banjaluka,
iero tuto contento, lustrà come una cluca.
Adesso xe cambiado, nissun più me richiama,
no i me fa bon el grado, no xe più viva mama
no go gnanca gamela,
e per 'ste gambe stanche de tanti demoghèla,
nissun dà dò palanche. |
L'arciduca
Co 'ierimo putei e vigniva un de Viena
per qualche ricorenza
mi, mama e i mii fradei saltavimo la zena
per 'ndar in Piazza Granda.
Se sentiva la banda
che la sonava in corte dela Luogotenenza;
davanti dele porte iera tapedi rossi
e drio dei finestroni
vedevo coli grossi che magnava bomboni.
Soto dei volti iera i servi de Palazzo
in calze e flaida nera, coi cordoni sul brazzo.
Drio i gendarmi la fola fazeva sburta e struca
quando col «Serbidiòla»
passava l'Arciduca.
I uficiai del comando ordinava l'Abtàt
e po' el mato smontando diseva: «Schöne Stadt!»
con drio la piazza piena e pien de barche el porto.
Papà iera zà morto
senza in scarsela un boro e sie patrone in schena,
quando el stava scampando fora de Villa Necker
con una borsa a folo
con sora scrito in oro «Francesco Ferdinando».
Ma dentro iera solo
tre camise e un Baedecker. |
Viribus
Unitis
Sul bel dei ani bei, ne xe s'ciopà la guera
e mi coi mii fradei per no andar sototera
se davimo maròt.
Ierimo de Marina
e lustravimo el jot del amiraglio Horty
nel arsenal de Pola.
Lu ispezionava i porti
in capel nero e argento fermà col sotogola
come i pizzigamorti, e mi bagnavo i flochi
pissando soravento.
Papà iera zà in tochi
per via del quel siluro che el ga smontà a Brioni
scaldandolo a carburo per sbagazar i otoni.
E mi son vignù grando sempre con questo credo:
ròbighe al Platzkomando, ma atento ala torpedo!
Che tempi, che ridade e che guera famosa:
le navi silurade fora de Pelagosa
e mi in infermeria co' un zerto Marco Mitis
per no dover 'ndar via
sul «Viribus Unitis». |
I
caffè
Co' ierimo putei, andavimo in cafè
e mi coi mii fradei, con una fràmbua in tre,
spetavimo zio Bruno che legeva i giornai
vardandose un per uno tuti quei ilustrai
de fora de Trieste.
Le riviste foreste
iera nei cartolai col nome scrito in oro
e lu, pagando un boro per la consumazion,
el stava fin le dieci al Cafè Secessiòn
opur, de sabo, al Speci.
Al Fabris e al San Marco
(qua parlo de quei ani 'ssai prima che i 'taliani
gavessi fato el sbarco) ghe iera tavolini
col marmo tuto scrito dei conti de fiorini,
che dopo i camerieri scancelava col dito
tociado nei biceri.
Papà iera zà morto
quando quei de Marina se gaveva inacorto
che no iera più i bori sul «Maria Carolina»
e lu nel cori cori iera cascà in Sacheta,
con tuta la casseta.
Ancora mi co' vardo
oltra dela vetrina me lo vedo in bareta
distirà su un biliardo del Cafè Transalpina.
Che tempi, che ridade, che bei cafè de moda:
le siore incapelade, i camerieri in coda
con anca nela zanca le guantiere de alpaca
e la traversa bianca de soto dela giaca.
Adesso xe cambiado: 'sti cafè più no esisti.
xe solo un dò che vado, in Riva e in via Batisti.
Xe gran torefazioni, senza gnanca le sedie
dove che va i muloni
con mule a far comedie. |
Il
discorso della corona
Co' ierimo putei, no iera el tredicesimo
e dicembre pei schei iera sempre el medesimo
de tuti i altri mesi.
I contava che i Inglesi
gaveva el sabo franco e la mesata dopia.
Noi del uficio copia, co' rivava le feste,
no vedevimo manco l'aquila con dò teste
sul cul de una corona.
E mia povera nona
me ga tirado suso sempre con 'sto principio:
Xe meio un mese in buso che un posto al Municipio. |
|
