|
Bog,
domovina |
L`addio
alla patria mia |
|
Bog, domovina.
Gren kruha po belen svete iskat,
zač su ovde mi ga zeli,
i gren pravicu po svete iskat,
zac su ovde mi ju zeli.
Bog, domovina.
V noći kako tat te moran pustit,
po šumicah moran bežat,
i te za vaveki moran pustit,
va tujoj zemje ću ležat.
Bog, domovina.
Ja poznan tvoj dih, dušu tvoju,
i šumi, gori i rečice
te moran pustit, zemju moju,
selo moje va dolčiće.
Bog, domovina.
Kot udovica samo ćeš ustat,
će drugi, moju, te uživat,
a sin če neboh ti po svete lutat
i vavek za tobun jokat.
Bog, domovina.
Ja gren, zač sunce će brzo prit,
ja gren po svete petjat.....
I nikad me ne će već nazad bit,
zač teško j' pravicu iskat.
ISTRO MOJA!
O, večna suzo na
oke mojen
Istro moja!
Suzo nikad ziplakana
muko nikad domučena,
Istro moja!
Tužna majko moja,
brižna zemjo moja
Istro moja. |
Addio terra mia.
Pane nel mondo ignoto vado cercar,
peche` qui` me l'anno tolto.
E giustizia nel mondo vado cercar,
perche` qui` me l'anno preso.
Addio terra nativa.
Come ladro di notte ti debbo lasciare,
ed oltre i boschi devo scappare.
Qui tutte le mie abitudini dovro lasciare
e in altre terre dovro` dormire.
Addio patria mia.
Io conosco il tuo sospiro e l'anima tua,
i tuoi boschi, le colline, le valli
ma ti debbo lasciare terra mia,
vilaggio mio bello nella vale.
Addio Patria mia.
Come vedova te rimarrai,
ma qualcun altro il mio godera`,
e tuo figlio nell'ignoto del mondo si disperdera`,
ma per sempre ti ripiangera`.
Addio mia terra nativa.
Me ne vado perche` presto sara` l'aurora,
me ne vado nel mondo l'elemosina cercar,
e forse mai piu` indietro tornero,
perche` sara` dificile la giustizia trovar.
O ISTRIA MIA!
Per sempre le lagrime negl`occhi
miei avro`.
O Istria mia,
lagrime mai piangenti prima,
del dolore forzato d`andarmene via.
O Istria mia!
O dolorosa madre mia,
sarai nella vita, e nel sogno, fino alla morte,
per sempre mia. |
|
Italian translation by Mario
Demetlica
|
|
|
Fakin od porta
Ni ga bilo ni ne će ga bit,
ki 'bi još mogal toliko popit,
koliko Berto od porta fakin
z baretun na bandu kot muškardin.
Z rukami v žepe va porte bi stal
va more pjuval i fijakal, .
i čekal, da pride kakov furešt
kemu će za manću bagaju ponest.
A kad bi od manći složil
fijorin,
bi vaje surgal se va gamazin,
spražnjevajuć litru, drugu bi zval,
ni dragi ga Bog ne bi već fermal.
Pijan bi pak plakal, život bi kjel,
zač da je jedanput boje živel,
a kad bi štufal se već i tega,
barufu bi storil - stukli bi njega.
Pokle bi jočuć pal va portun
i još od ženi ćapal matafun...
A jutra bi sopet, nesrećni sin,
gledal va nebo i čekal fijorin...
I umrl je grdo. Va kanale
su jutros ga dve mlekarice našle.
|
Kastavska
balada
(a song)
Sveti patri, ježuviti,
vavek lačni, nikad siti,
od Kastva su vlast imeli
i delali ča su teli.
Lačni kmeti post postili,
žuj žujili, pot potili,
ježuviti jili, pili
i dobre su voji bili.
Kmeti su zemju kopali,
krepevali, gladovali,
ježuviti spovedali
i va nebo otpravjali.
- Slava bogu na visini,
gre dobro nan va nizini,
ćemo crekvu sagraditi
i za milost zahvaliti.
To su patri odlučili,
Kastavštine razglasili:
Kmeti će pod tlaku delat,
dragi bog će s neba gledat.
Su se kmeti razjadili,
dosta su njin krvi pili:
- Si ih videl, pasja noga,
zamešali su i boga.
Ni mu dosta, ježuvitu,
da se hrani na koritu,
da nas cedi, da nas preša,
leh i boga va to meša.
Crekav teli bi zgraditi,
Z našun mukun se hvaliti,
i da bog će to još gledat,
ma ću rogi ja njin delat. -
Skaču patri i zaklinju,
vape, prete i proklinju,
sakramenti uskraćuju,
va verigi judi kuju.
Ma su kmeti trdoglavi,
jedna voja, tisuć glavi,
slabo crekav napreduje
i ča daje sve to huje.
Sad, je proto, al su kmeti,
aIe štrigi, al duh sveti,
jedne noći, kratko malo,
k vraniću se j sve tonbalo...
Ježuviti su nestali,
šjori va zemju propali,
ustal narod koreniti
ki je bil i ki će bvti.
|
Kmet
se je stal
Prišal je glas
velik i svet:
»Stani se kmet,
sada je čas.«
Prišal je glas
i kako strel
zemju preletel.
I pokle stotine let
sopet se dignul je kmet.
Za zemju i pravicu,
za svoju starinu,
za svoju dečicu
i za domovinu.
I kade mu noga je hodila
sve je zdrobila,
i kade je pesnica udrila
nišni pustila.
A zajedno s njin su seni hodile
milijuni seni njigoveh stareh,
ki su ovde živeli,
se mučili i trpeli
zemju kopali,
s krvun natapali
i robovali.
Svu je zemju pasal,
a onput velik i jak.
ponosit je na Učke stal.
I glas je njegov zagrmel:
»Ja, istrijanski kmet
svoju zemju san zel.
I joh onemu
ki sopet bi zet mi ju tel.«
|
Lovka
(a song)
Jako z davni to je bilo,
va Kastve se j' dogodilo.
Kapitan je bil šjor veli
odzival se j' na Moreli.
Ni bil prvi, ni najhuji,
va njemu je tristo guji.
Lakom kako ježuviti,
vavek lačni, nikad siti.
Mala j' tlaka, desetina,
štibri vele, baril vina,
daj kokošu, ovcu, kozu
za tu beštiju golozu.
I još masti, putra, sira
I svakega božjeg pira,
I divojku jednu belu
za devicu šjor Morelu.
Kmet se buni: - To j' previše,
kako nas ()visti siše,
ni zakon on nevajati,
neće za zakon priznati.
A kad išće svet pravicu,
on ga stavlja va tamnicu:
- Porki šćavi e vilani,
pravda je pul pantigani.
Jadi se sudac Kinkela,
nepravica da je vela,
a na place teta Mare
sen Kastavcem glavu tare:
- Brižnicini, janjci pravi,
če ga neki ne zadavi?
Da san muški ja bin tela,
noć pojila bi Morela.
Pul Jušic i pul Jurdani,
pul Saršoni, Rukavčani,
neš se kuha, neš se muti,
od jada su judi žuti.
Kad jedanput šjor Moreli
va crekav su poć oteli,
narod ga j' vane dočekal
dve besedi mu je rekal:
- Dosta j' bilo, kapitane,
nećeš tlačit već vilane,
telo ti se je zredilo,
na dušu bi mislet bilo.
- Taži šćavo e vilane,
zakričal je kapitamo,
ma su kmeti ga ćapali
i put Lokvi remenali.
Prestrašila se j' šajeta:
- Pomoz bog i majko sveta,
ma su rekli mu vilani:
- Ćemo prez njih, ćemo sami.
Se do Lokvi ga nosili
onput ruki opustili:
- Ki će, judi, da ga rine,
da ga vela žeja mine.
Zabučelo j' kako more,
tisuć ruk se j' diglo gore,
a pul vodi smutnja vela,
v' njoj nestalo je Morela.
Još ga j' Z iglun teta Mare,
badnula po ,sredi stare,
kad se j' malo pokazala,
prvo lego je nestala.
A kad su njin sud storili,
Kastavci su složni bili:
- Istina je, šjori, cela,
Si smo rinuli Morela.
Z davni to se j' dogodilo.
kad Morela j' utopilo,
ma je štorija ustala,
ku j' mi nona povedala.
|
Moja zemlja
Pod Učkun kućice
bele,
miće, kot suzice
vele.
Beli zidići, črjeni krovići
na keh vrapčići
kantaju.
Mići dolčići, još manje lešice
na keh ženice
kopaju.
Cestice bele, tanki putići,
po keh se vozići
pejaju,
i jedna mića, uska rečica,
pul ke se dečica
igraju.
Na sunce se kućice
griju,
na turne urice
biju.
|
Nonić
Kad san još mići bil
s nonićen san na ribi hodil,
Okol' četrte bimo se stali
i sve do pišmoj veslali,
barku surgali,
povrazi v' more kalali,
sedeli,
mučali,
al' ćakulali.
Kad bin kakovu ribu ćapal
i nonić bi s manun užival,
rekal, da pasja ta noga,
ćapa, na moj'ga boga,
već i pišmoja...
Mirno bi bilo okole nas,
more, bi se leskalo,
na tihen vetre zibalo
i neš šapicalo.
Pod jutro bi s kraja kosići fikali,
se dozivali...
Sunce bi z brega shajalo,
pomalo, kot da ga j' strah
na jedan mah...
Ma jedno jutro, kad bilo se j' stat
ni bilo nonića vnuka zvat:
po kuće su judi na prsteh hodili,
nonu mirili,
Boga molili
i žuti lumini palili.
|
Pod
Učkun
Pod Učkun kućice
bele,
miće, kot suzice
vele.
Beli zidići, črjeni krovići
na keh vrapčići
kantaju,
mići dolčići, još manje lešice
na keh ženice
kopaju.
Cestice bele, tanki putići
po keh se vozići pejaju,
i jedna mića, uska rečica,
pul ke se dečica
igraju.
Na sunce se kućice
griju,
na turne urice
biju.
|
Stari mladić
Kaneta,
jaketa,
garoful,
šćapić,
i koračić kot vrapčić ...
gotov je stari mladić.
|
Sunce
Petešić je vajer skočil
zakukurika1:
»Sunce, Sunce, dan prihaja,
ja san se već sta1.«
Težaki su se zbudili,
do vodi su šli,
i na vode su se prali,
do pasa goli.
Stari Zvane po dvorišće
sve j' neš pohaja1,
kako vavek i danaska
na neš brontulal.
Va kuhinje, nona Tonka
kuhala j' kafe,
a nevesta, Jele lepa,
zibala j' dete.
N a cestice, z jedne jami,
pijanac se j' stal,
zaćujeno gledal Sunce
i klobuk iskal.
|
Tanac
Armunika cvili, bas rompota.
Tanac se širi,
zibje i gibje,
semo, pa tamo
tancamo.
V naručaj moj se j' stisnula mala,
tiho njoj šapćen,
pa se smeje srdačno i srećno...
Nanke ne znamo,
da zaprteh oči tancamo.
Armunika cvili, bas rompota.
Srce mi j' puno jubavi,
Umret bin tancajuc s malun tel,
mala tancajuć s manun.
Kad tanac fini s malun ću poć
vanka, va lepu noć,
pred kućun ćemo njijun sedet,
pa se strpet,
dokle se mesec, stari mladić,
ne skrije za oblačić.
|
Trešete
Svaku su večer trešete igrali
i svaku se večer rad kart pokarali
moj nonić i nona.
Nonić bi pipu fumal i mučal,
kad ne bi dobival.
A kad bi partidu dobil, .
bi se none rugal,
užival,
i asa lišal,
Igrajuć bi nona večeru kuhala
i vavek se vekon stajala.
večeru zmešat,
oganj naložit
i sol doložit.
Smešni su bili nonić i nona onako za stolon:
nonica z oćali,
a nonić s pipun v usteh:
nona dobivajuć,
nono brontulajuć,
al' kako je već bilo.
A kad bi se pak posvadili,
omput se j' sve treslo. -
Ma to ni niš značilo,
zač drugi dan na večer,
kad je zamračilo,
bi nono nonu zval:
»Marjanko, remo igŕat!«
|
Tri nonice
Tri nonice stare
pred kućun su stale
i kritikale.
I Katu, i Pepu, i Jelu,
i Toncu debelu.
Jedna da j' takova,
druga onakova,
jedna bi se rad ženit,
druga se zna lenit,
treća sve zafraja
četrta da ne vaja.
A svet da se j' pokvaril,
i prvo da j' boji bil.
Tri nonice stare
su kritikale
od osme do polna.
A kad je polne zvonilo,
jednoj je doma poć bilo.
Su dve ustale
i nju kritikale. |
Va
sremskoj ravnici
Istranon, ki su poginuli va
Sreme
za slobodu svoje domovine.
Sneg pada i sva je ravnica bela,
vela ravnica prez kraja,
ku nikad ne ću pasat...
Smrt već pomalo prihaja,
a ja san sanjal, o mat,
kako ću doma prit
i kako ćes čut od sina
da j' slobodna domovina.
Deset san let tako sanjal
i deset let za tobun plakal,
delal i čekal,
mučal i trpel
i va sanjah živel.
A kad je prišal ta čas,
kad san već čul ti glas
i videl more, kuću, tebe,
pušku san zel i šal...
Ma dug je bil put, o mat,
i ja san pal.
Me nikad već ne ćeš videt,
mat moja,
mi nikad već ne ćeš reć:
»Sine, rano moja«.
Ovde ću za vavek ustat...
Sneg pada po veloj ravnice prez kraja,
na koj Istrijan leži;
pokril je nogi, ruki, čelo
i ni ga - sve je belo. |
Va tujine
Tolike
već leta po svete se klatin
i hodin od mesta do mesta;
me pozna svaki put,
me pozna svaka cesta,
i svaka oštarija
zna kade j’ Opatija.
Kad san od domi šal
mladićac san bil bled
i niš nisan još znal.
Danas san star i sed,
i sve san pretrpel,
i sve san doživel:
Vino, jubav i sreću,
nevoju, bol i žalost,
i rug i poniženje.
Ma najveća je žalost
tujac bit va tujine
čovek prez domovine. |
|
