1

SRCE I LAHAT

Na vrotah ot velega k-afe inbati. Tonić zensko ka je hodila vonka i koko neso mogli pasat- nabot, tohne je s lahton va prsa. Poce se siromah skuživat na se -fôzi, a samica samo muci. Najzôd će Tonić:

- Ku jimate srce mehko -koko sasci, jur cete mi prostit?
- Vero ćun ku van je ona -stvor trda koko lahat!"

IL CUORE ED IL GOMITO

In Albona, sulle porte del grande caffè. Tonić s'incontra con una signora che stava per uscire, però grossi comm'erano non potevano uscire ed entrare nello stesso tempo, Tonić non volendo, presso' il suo gomito sul petto della signora, e poverino in tutti modi incomincio' a scusarsi, la signora lo guarda e non dice nulla, dopodiche' Tonić la supplica dicendo;- se avete il cuore tenero come le vostre tete (zize) spero mi perdonerete?

Verramente vi posso perdonare solo se QUELLA cosa è cosi dura come il vostro gomito, rispose la donna.

2

POLI MîDIGA

Na Dom zdravlja va labin pride jena šinjorica poli mîdiga. Kat ju sla nutra se je pocela tužit da ni kontenta z mužon, osto da je malo badd.

- Sinjora, ca ne vidite da son pun dela. Ku van ni dosta muz, nojdite si amanta!
- Son si nosla, ma ne pomore!
- Alora nojdite si jos jenega.
- Son sinjor dotor, ma nanke ni to ni pomoglo.
- Benj, nojdite i tretega.
- Jiman anke njega.
- Onaput ste, lepa moja zenska, za sprovega bolna!
- Justo, justo, to son otela i ja da mi recete. Jos ku biste mi to napiso, tako da mi muz ne rece da so kurba!!!

DAL DOTTORE

Nella clinica in Albona, una signora si presenta al dottore, e subito si lamenta che il marito la bada poco.

- Signora, non vedete che sono troppo occupato? - Se non vi basta il marito, trovate un`amante.
- Si, l'ho trovato, ma non m'aiuta.
- Allora trovatene ancora uno.
- Signor dottore l'ho trovato, ma nemmeno questo mi aiuta.
- Va bene, trovatevi un terzo.
- Ce l'ho pure quello.
- Dunque son certo mia cara donna, ch'e' ammalata davvero.
- Giusto, giusto, proprio questo volevo che mi confermate. Ancora se mi potreste scriverlo, - Cosi' mio marito non mi accusa che sono una puttana.

3

ŠKRTA

Svadile so se Tonina i luce:

- Ti si kurba - vopi na nju Luce.
- Koko da ti nebis bila da nesi toko škrta - rišpondi Tonina.

TIRCHIA / EGOISTA

Antonia e Lucia si bisticciano:

- Sei una puttana - grida ad essa Lucia.
- Lo saresti pure te, se non saresti cosi' egoista - risponde Antonia.

4

NA OBEDE

Bili so neki naši jeno por don va rezerve. Tako je poli jenega ot njih na skriveć priša pretel. Donesa mu je dopjo, ali i va vuho reka da mu se sused Franić vrti poli ženi. Pokle cetiri dni vme se muž doma. Zena mu je storila malo bolji obed i za stol pozvala anke susedi. Cakulojo oni tako i najedonput muz na segovo zapita suseda:

- Benj, jo moreš još co?
- Tako, tu i tamo - rišpondi sused.
- Za tamo me ne briga, ma ku budeš tu, vrah će ti na kosti sos!"

A PRANZO

Alcuni dei nostri un po' di giorni erano in riserva (militari) cosicche' ad uno di questi di nascosto si e' presentato un suo paesano con un doppio di vino, e nell'orecchio gli sussura che Franić (il vicino di casa) si miscia con sua moglie. Dopo quattro giorni il marito ritorna a casa. Per l'occasione la moglie gli prepara un buon pranzo invitando pure i vicini di casa. Chiacchierando un po' di tutto, poi il marito con astuzia chiede al vicino di casa:

- Allora com'e' con te? Fai ancora quella cosa?
- Beh... un po' qua, e un po' la'. - rispose il vicino.
- Per la' non me ne importa, ma se lo fai qua', il diavolo ti rompera' le ossa.

5

MÔDA OT HORTI

Piso je p reteI ka dela va Dermanije svojemu pretelu da mu jovi ca je novega va sele i ca mu zena dela. Letera je tako pocela: "Lepi möj pretelo, poli nas je puno novitOdi. Luce se zakonila, Morko se je inbarko, Tonic je porti va grad... Poli nas va sele je va mode igrat na horti oli se jahat. Ti znos da tvoje zene ni nidar hodilo igrat na horti..."

MODA DI CARTA

Un`amico che lavora in Danimarca, ha scritto al suo amico a casa che gli faccia sapere qualche novita' del villaggio, e come si comporta sua moglie. Lui gli risponde cosi': Amico mio caro, da noi novita' e' che Lucia si e' sposata, Marco si e' imbarcato, Toni si e' trasferito in citta', e altro come gia' lo sai, da noi e' sempre la moda di giuocare le carte e cavalcare. Te lo sai che tua moglie non sa giuocare le carte..."

6

Muz je brontulajuc nekega vraga isko po kuce i najzot pita zeno:

- Marija, koliko je ur?
- Fali dvajsti do cetireh.
- Son zno! Va te kuce mora vajka nesto falit!

ORA

Il marito cercava qualcossa nella casa, ed a un tratto chiede alla moglie:

- Maria, che ora e' ?
- Mancano venti alle quattro,
- Lo sappevo che in questa casa sempre manca qualche cosa.

7

MESEC

Gonajo se Sipe i Mote:

- Si vide koko Rusi i Merikani vec zivijo na Mesece?
- Ta ni nic kontra non. Mi zivimo ot meseca do meseca vec toliko lit, pa ca?

LUNA / MESE

Giuseppe e Matteo si parlano:

- Hai visto come i Russi e gli Americani gia' vivono sulla luna da diversi giorni?
- Questo non e' niente rispetto a noi che viviamo di mese in mese gia' da tanti anni, e allora?

(Note: "mesec" means both luna and mese;  the humour is lost in italian)

8

NI KRIF

Möli Tonić vajka je za se va kuće bi krif. Jedon dôn, dök je otac bi na kampanje, je priša šontol Frane, pa je mat otroka poslala vonka. Kurjož Tonić je šo kukat na kljucanico i vide koko šontol kaliva brageši. Sa prestrašen je zajno zat ten šo tekoć na njivo zvat oca.

- Ćaća, ćaća greš zajno doma.
- Kega vraga me vopiš? Ca ne vidiš da jiman dela?
- Vidin, vidin, ma sejno greš zajno doma da i ta put ne buden krif!
- A zoc biš ti mora bit krif?
- Vero ku se šontol Frane posere va kamare nemöj me tuć!

NON COLPA

IL piccolo Toni in casa era sempre colpevole. Un giorno mentre il padre lavorava nella campagna, in casa e' arrivato il santolo Francesco, e la madre mando' Toni fuori di casa. Curioso, Toni ando' a spiare oltre il buco delle chiave, e vede come il santolo sta' mettendo giu' i pantaloni. Spaventato di quello che ha visto subito corre in campagna da suo padre e gli dice:

- Papa', papa' vieni subito a casa, perche' non voglio anche questa volta esser colpa.
- E perche' dovresti esser colpa? - gli fa il padre.
- Se davvero il santolo Francesco fa la cacca in camera, non picchiarmi. - rispose Toni.

9

STATISTI

Film "labinska republika" se je parićiva anke va labine, Rlke i još va nekeh mestah, ma samo poli nas so za statisti iskali batice ot komuna.

- Zoc? - pita Ive svojega kumpareta Tonića.
- Osto tako i tako smiron na dele statirajo - rispondi Tonic.

(No traslation.)

10

GEMIŠ

Frežak udovac gona va oštarije s pretelon.

- Žena mi je umrla, son osto šom.
- A ca ćeš...
- Vero jedon gemiš.

(No translation.)

11

KABANICA

Zajno pokle vôjski jedon šofer ot "Autoprometa" je s kambijônon šo va Rîko. Tvu ga je sre jedon marinaj, ka ga je zamoli ku bi ga moga zet va Labin. Šofer, šlovek dobrega srca, znajuć da marinaj nima s ken poć doma rišpondi mu neka se samo naprti va kabino na sedil do njega. Mlodi marinaj, munjen ot kontenteci, mu natô veselo dî:

- Puno van fala. Cekajte me samo jedon minut da gren po valižo i kišno kabanico!

Šofer, ka ni znô ca je to kišna kabanica, zat njin zavopi:

- Kumpare, mi se parô da nesmo se dobro kapili. Koko son van obećo Vas ćun zet, ma va kabine ni mesta i za Vašo šinjoro!

12

SEDAN LîT OTZÔDA

Pasano leto so neki Labinjani za Novo leto bili va Merike poli svošćini. Kat so se tarnali, jenega ot njeh so na dele pitali koko je tamo.

- Dobro, samo so sedan lît otzôda nas!
- Koko tô more bit?
- Lipo, os jimajo sega koko i mi pret sedan lît.

13

VELA KORIS

Ive: Si vide ti ke komîdiji sada z temi pôsi ot vituri. Sada se moramo veživat za storit sto metri.

Mario: Vero se treba veživat, oš to jôko pomore. Ja son tô vide na svoje voci!

Ive: Ca si vide? Ca je ki tohnu?

Mario: Dvô ot njih so se direto inkontrali z vituro. jedon je bi vežen, a drugi ni. I pensoj ti malo, ta ka ni bi vežen je zlete skrôz stokla ot vituri, udri je va jedon pa! ot letriki i je, siromah, šo na nekoliko kusi.

Ive: A ca je bilo z onen ka je bi vežen?

Mario: On je vero na sedile osto lîpo koko da je žif!

14

ROGI

Jedon je dela na špedicije, pa je na rîtko bi doma. Tako mu je neki dôn neki pretel reka da mu žena Marija dela na gusto rogi sa susedon. Da bi je ćapo in flagranti on ni je jedon dôn reka da gre s kambijônon va Zagreb. Namesto poć na put on se je skri na šufit. Ni pasalo ni pul uri kat eko ti njejnega amanta va bele stomanje i šjarpo pot guton. Brižan i prevaren muž ni zno koko da se prežentô pret njimi, pa je ot velega jôda pošne sôm sobon gonat:

- Marijica moja da neson sada va Zagrebe, bi ti vrah sada na rebra sopa!"

15

NA MESECE

Pride Merikon na Mešec z raketo i nojde gore Labinjona. Cudi se on otkuda on gore, pa pita Labinjona:

- S cen si, te prosin, prisa gore?
- S pricjami.
- Dobro, dobro - dî Merikon, mi ćemo le tornat dole z raketo, ma koko ćeš ti?
- S dinaron - rišpondi Labinjon.

16

NEMCI

Prave ljudi da je jedon naš šlovek vrîme vöjski, kat so se hodili skrijivat va bunkeri, saki put kat so kalivali kukurato, jôdan gono:

- Cito, Nemci gredu!

Toliko lît kašneje naš je šlovek kambijo besedo i kada se danas pride poli njega gona:

- Cito, Nemci spijo!

17

PECURBI

Gonajo dvô pretela va zadnjeh rîdi na zastanke:

- Skužoj, si ti oženjen?
- Vero son i tô tri puti.
- A ca so te se tri pustile?
- Vero ni jedina. Umrle so, Bôh hi pomilova, a treta je, siromaha, jušto danas.
- Ot cega so umrle?
- Prva ot pecurbi, druga anke ot pecurbi.
- Ma ni valja i treta portila ot pecurbi?
- Ne, ona je brižna šia ot batića, ošto hi ni otela jes!
- I ca nesi danas na funerale, kega vraga delaš udeka?
- Najprvo delo, a pokle fešteđat!!!

18

POLI CIMITRA

Jedon labinjon je jime pasat poli cimitra, ma već na pedeset metri poce ga ćapivat strôh. Na tô je pret sobon vide jenega šloveka i sa kontenat mu dî:

- O va, dobro da ste vi tu, perke me je bilo strôh pasivat sômega.
- Nic ne za tô, anke mene je bilo vajka strôh kat son bi žif -rispondi on.

19

SVECI

Foli se Talijôn Istrijanu koko oni jimaju trdo lepa imena: San Pietro, San Marco, San Paulo, San Giovanni... Siromah labinjon, ka se ni ote hîtit pot nogi, mu na tô rišpondi:

Nesmo ti ni mi slabeji. Te pježôjo nasa istrijonska imena: san lačan, san židan, san gol, san bos...

20

GLUHI

Imbatila so se dvô glušôna i met njimi je poce takof diskorš:

- Ćo, ca reš Labin?!
- Ne, gren Labin!!!
- Aha, dobro, dobro, son paro da greš Labin!!!

21

TOVARI

Kupi labinjon jedanajs tovari na samlje. Kupi je anke butiljôn vina, zajaha jenega tovara i porti kontenat doma. Zbrôf da je stori lepi afari, sako toliko je malo potîgnu z butiljôna i pokle nekega vremena je bi trdo "vesel". Tako, saki put kada je broji tovari, jedon mu je fali, ošto ni broji onega pot sobon. Sa dišperon, farmô jenega šloveka na pute i lîpo ga zamoli ku bi mu zbroji tovari, perke da hi vidi samo deset. Šlovek će mu natô rišpondit:

- Lepi moj slovek ja vidin dvanajs tovari. Deset na kupe, jedanajs na ken sedite, a dvanajsti ste vi!!!

22

BRATI

Riko Škopac-Salakovac, bloketor i jedon ot najpoznatejeh Labinjoni, jima brata Lučaneta, ka mu jôko spodobi, pa je teško na prvi môh dojenat ka je ka. Tako neki dôn pride poli njega neka ženska, ka je otela kupit bloketi, pošpjô trdo Riketa ot glôvi do peti, a fala Bogu visok je koko šparoga, pa mu dî:

- Skužojte, ca ste tô Vi ili je pret manon Vaš brat?

23

3. ĐOGRAFlKA

Zajno pokle gvîri Labinjon je s vaporon šo va Rîko. Kat se je tarniva doma na mule va Rike je vide više veženih brodi i koko ni zno ka gre za Rabac, ni bilo druge nego da pita jenega mladića. Koko ga siromaha prestrašenega ni kapi dobro na labinjonsken zajiken, mladić mu je pokozo brôd s targo na ke je pisalo "Rab". Natô će Labinjon zavopit svojega sina:

"Môli, ala hojmo ća na vapor. Tuka za Rabac prave Rab!!"

24

GRAH

Zajno pokle oslobođenja va butigo poli Faraguni priša je jedon furešt šlovek i na hrvûsken je zapito:

- Molim vas imate li graha?

Labinjon, ka je zno gonat samo po naše, ni kapi vlôsa, ma se ni pusti poznat, pa je rišpondi: Jimamo, jimamo, samo mi dajte boco!

25

ZNÔ BOLJE

Kat so šoferi "Istratransa" pošneli na špedicijo hodit va Jugoslavijo, neso se mogli nacupit koliko trukinji jima narod va Slavonije. Tako se dvô kumpônja farmôjo poli jene fameji.

- Šinjora, pita jedon ot njih gospodarico - ćete nan prodat kvintol trukinji?

Koko ga ona siromaha ni zrna kapila, va diškorš se je hiti drugi kumpônj z besedami:

- Šinjora, on vas moli ku ćete nan prodat jedon kvintol fermentona!

26

TONI OT MAKINAH

Naša nônica, ka gre na rîtko ća ot svoje kući, sia je va Pul vizitat svojega sina. Koko ga ni bilo doma, šla ga je iskat va "Uljanik", kade je dela. Kat je prišla na portôn, pita gvardjôna:

- Drug, ćete mi zvat mojega sina...Ca ne poznôte Toneta ka dela na makinah!!!?

27

NI KONTENAT

Va jeno naše selo pride veternarjo da, koko se onô po hrvuški pravi, umjetno oplodi kravo. I kat mu je gospodarica, ka se ni zvôla Lina, prezentala kravo, onoko malo blatno, mîdih ot blôga se je malo ofendi, pa je reka:

- Gospođo, ova krava nije odveć cista!

Naša gospodarica, ka se ni zvôla nanke Tonina, će nato, na pôl glôsa:

- Dôtor möj, ca van ja moren. Do sada hi je ona pasala sakokoveh (pensala je na baki, da se kapimo), ma vi ste prvi ka ni kontenat!

28

DEPÔŠNO VINO

29

DIŠTURB

Hodi Ive preko mosta ot Raši i cuje nekega zijat na sa glôs spot moston.

- Ca toliko zijaš - pita ga Ive pun krijonci.
- Neznôn plavat - zavopi onaisti pot moston.
- Pa ca? Neznon nanke ja, pa sejno ne vopin i ne dišturbivan drugi ljudi koko ti!

30

KURVE

Zajno pokle gvîri va kôvo je prišlo puno inžinjeri ki so gonali samo po hrvuški, a naši ljudi so se najbolje kapili kat so met sobon gonali po naše oli talijônski. Tako je jedon dôn šofer ot "Raši" mora va Riko peljat jenega inžinjera ka je vajka jime vrajžo prešo, pa mu je smiron gono: Brže, brže! Već štuf šofer mu je rišpondi:

- Drug inžinjer ne moze brze, perke su mnogo kurve.

Koko ga inžinjer ni kapi, sa je jôdan i nervôz poce vopit na brižnega šofera:

- Pusti ti kurve i lumperaj, pa nećeš biti umoran i pospan!

31

BUZET

Na jenen zastanke gonalo se je pôr ur samo o općinsken budžete. Da treba cuda beci, da fali tamo, da fali vamo... Jedon šlovek je cîlo vrîme tô posluho i najzôt zavopi:

- Dobro, ljudi moji, niman ja nic da anke Buzet dobije beci, ma moramo i nôse pensat!

32

PETEH

- Sipe, rece Franica jeno jutro svojemu mužu, jutre je 25 lìt da smo se zîli, se spametiš, a? Mi se parô di bilo dobro da ćepôš najvećega peteha va štalete.

- A zoc moja Franica, rišpondi Sipe, tr ni on krif ca smo se ja i ti uženili!

33

NA CIMITARE

Jnkontrala so se dvô storca na cimitre va Svete Nedelje.

- Koliko lìt jimaš - pita prvi drugega.
- Osandeset i pìt -dî prvi i zajno pita pretela va ken je on lete.
- Ja jiman, jiman, cekaj da se spametin, aha, ja jiman 95 lît.
- Lepi moj pretel, ku je tô tako, ne robi nanke da greš doma. Moreš i tu zustat!

34

GA JE FREGO

Sipe, kampanjôl, bi je vajka prontza škerac. Spravi se on tako, jedon dôn s korijero va Barbôn. Kat je priša biljetarjo, Sipe pita biljet za Pul i ploti po rîgule. Pasô biljetarjo napret, a Sipe se, na tiho i šegovo pofoli šloveku ka je sede do njega.

- Ma son ga štabilo frego. Plôti son za Pul, a gren dole va Barbône. Pravo mu budi kat je štupidas.

35

DECA I KOKOŠI

Pretokali so Ive i Marija vino ot vele va môlo bacvo. Najedonput va môlo bacvo pôde jena vela pantagana. Ive se ćepô za glôvo i dî Marije neka zlije to vino, ošto da mu se stomihot tega digiva. Marija ni otela zatô ni cut.

- Ne delaj tô Ive moj 1epi. Vino ni dobro za nas, ma će bit za preteli i susedi, oni ne znôjo da je pantagana pala nutra.

Tako je i bilo, ošto ženske so proklete ivajka mora bit koko će one, magari so muški kapeti va kuće. I tako jedon dôn poli Iveta pridu dvô njegova dobra pretela. Neso ga nošli doma pa so seli, a Marija donese polić vina ot miće bacvi. Jedon ot njih je dobro potîgnô, a drugi ni ote, perke je peljo vituro. Na tò va kućo pride njihov sin, môli Tonić ot šîs lît, pogleda preteli, pa rece matere:

- Ca si njin dola ono vino va ko je pala pantagana?

Kat je tô cô šlovek ka je pi, preselo mu je i lonac s kega je pi, je po nokla i sa se je razbi. Kat je tô vide môli Tonić je zavôpi.

- Mama, mama kamo će pišat sada naša nôna?!

36

POSUDBA

- Toni, posudi mi deset miljari!
- Mi je vero žol, ma jiman samo pît miljari.
- Dobro, dobro, daj mi pît, a još toliko ćeš mi ostat dužan!

37

SAUČEŠĆE

- Tata Marija, ca delate va banke?
- Prontivan se zet zajam.
- A zoc brojite tô munido?
- Gledan ku će mi rivat za saučešće.

38

KÔBILIN SIN

Pride se naš šlovek potužit va kućo jene stareje ženske na sina:

- Šinjora, vi ste vero prôva i šesna ženska i niman se cô na vas potužit. Ma oni vaš sin...ne meritô nic drugo nego da mu šlovek rece da je...da kobilin sin!

39

NOVA VEŠTALJA

Prišla je jena starica va starački dom, neson sigur ko va Rašo oli Nedescino, i saki je dôn kambjevala veštalji. Ma sejno, jedini sômac se ni obraća zat nju. Štufala se ona tega i lîpo se je jedon dôn sukla nôga i pret semi se je tako prežentala. Met njim je bi i Sipe, ka ju je finalmente pošpijo i pokle tega reka pretelu Tonetu:

- Toni, si je vide. Anke danaska je obukla novo veštaljo!
- Je, je - dî Toni, ma ju je mogia almeno suprešat.

40

STOLICA

Zapeljali so Labinjona va pulski špidol. Prîde mîdih pa ga pita:

- Gospodine, kada ste zadnji put imali stolicu?

Naš Labinjon, pun strôha, rišpondi: Sutra. Kat ga je i po drugi put sejno pito, Labinjon mu je nopet rišpondi: Sutra. I tako još nekoliko puti dök se mîdih na kraje ni spameti pa ga je pito ot kega je kraja. A Labinjon sa kuntenat pravi da je z Labinšćini.

- Sada mi je sve jasno - rece na tô mîdih. Vi ste iz kraja gdje se to čini jedan dan unaprijed!!

41

RACUNI

Žena i muž, saki ot šezdeset lît, šli so po prvi put na feriji saki zôse. Kat so se tarnali doma pitali so jedon drugega koko so pasali, ki je cô noša. Muž ni rišpondi da je noša jeno ot 20 lît i da je jôko lîpo paso. Žena mu je rekla da je i ona nošla jenega ot 20 lît.

- Benj, parôn da smo sada paređi - dî muž sejno jedon tantin delôz.
- Ja, môj lepi muž, ma 20 gre va 60 tri puti, a 60 va 20 ne gre nanke jedonput!!!

42

"LABINJON"

Za vrîme Labinske republiki Labinjoni so oteli; koko i saka prôva država, da jimaju svoji beci. Pokle dugeh pensiri jedon ot njeh je ote da se domoći beci zovejo "Labinjon".

- Ne, tô ne more - dî drugi. Koko bi bilo da gremo na Vlašijo kupit tovara i da nan oni, kat budemo pitali koliko koštô jedon tovor, rišponde: Dvajsti Labinjoni!!!

43

FEROL

Imbate se dvô Labinjona na rîbah i pošnejo se folit ca je ki ćepo.

- Ja son ćepo ribo ot pît metri - di prvi.

A drugi se pofoli:

- Ja son z mrežo vine ferol ka je još sveti!
- Malo si ga preveć zlago ta put - rece prvi.
- Benj, ti skrôti ribo, a ja ćun ugosit ferol - rišpondi drugi.

44

BRAT

Peljô Milijo Milevoj Matijin svojega pretela Marija Milevoja Kagarina va viture za Pul. Kat je na pute imbati jenega tovara, va kerce je reka Marijetu:

-Marijo, viš ti ga brat!

Marijo, ka je bi nešto va pensirah i ni bado kuda pasivajo, mu koko ot škapice rišpondi:

- Ka? Bepi oli Šilijo?!

45

VA ŠKULJE

Po je Labinjon va jeno velo škuljo i da se ni rivo ćepat za jeno gron, nebi se bi šalvo. Kat so ga videli njegovi preteli, a bilo hi je cetiri, hîtili so mu dugi špôh. Zajno so šli za ten da se on smeji koko munjen.

- Digivajte ga pomalo - di jedon ot njih, je videt da se ot veleg strôha pomuti.

I kat so ga najzôt dignuli, on se je još smejo koko munjen. Puni strôha pitali so ga ca mu je.

- Vlôsa mi ni, štupidi. Poce son se smejat kat son se spameti koko bi bilo da pustin špôh i da vi si cetiri pòdete na guzico!

46

PAREĐI

Potukli so se Labinjon i Bumbar. Labinjon je bi forteji i lahko je Bumbara hîti na zemljo. A kat je Bumbar priša va Vodnjan sa prekinjen reka je svojemi:

- San hi dobija, ma san mu hi i reka! 

47

VA ZAGREBE

Cirka tristi lît nazat poceli so kambijôni "Istratransa", ka se je onaput zvô "Autopromet", peljat po Jugoslavije. I tako so dvô naša šofera prišla va Zagreb i seli za stôl va jene oštarije. Jedon ot njeh, bit će da je bi Toni, pride pret šank i pomalo plaho zapita:

- Vas lîpo molin, dajte nan dvo po dvo, španjoleti i farminonti.

Kamaljera ni kapila, se kapi, ni kolpa. Pogledala ga je blîdo i zavopila svojo pretelico:

- Štefa, prosim te lepo, dojdi sim, došli su neki stranci, ne razmen ih niš!

48

ZA PRVI PUT

Ćepo Labinjon svojo ženo da mu nabija rogi z Vlahon. Onoko jôdan ga zgrabi za haljo, hîti va vituro i dopeljô do mosta na Raše, pak mu zavopi:

- Za ta put toliko. Ku te ćepôn drugi put va moje pustelje z mojo Marijico, dopeljat ćun te do piaci va Barbône da te vide si i da te bude trdo sron!

49

KINIZI

Na popise pret desetak lît komisija se je nošla i va jenen sele poli Cera. Kat so kapeta ot kući pitali ke je on nacionalnosti siromah ni kapi, pa je rišpondi:

- Ki ca ja?

Sejno domando so prezentali i zene, ka je anke pitala:

- Ki ca mi?

Pretsednik ot komisiji, ka ni bi ot naši kraji, pa ni kapi naš zajik, svojemu je pomoćniku naredi:

- Zapiši: Dva Kineza!

50

PIKOLECA

Noša je jedon labinjonski grobar jenega šloveka, malo "mokrega" koko narekova na grobe:

- Ca tu delate?
- Ca ne vidiš? Plôcen nat mojo brižno ženo!
- Skužoj, ma ona leži va grobe dvô koraki napret.
- Ni dvô koraki napret, ni dvô koraki nazat, samo da je ni poli kući!

51

ŠIROKE KOSTI

Uženila tîte Bepina svojo hćir Mirandico za Franića. Franić je bi dobar, ma samo malo zarebaćen i za nôpak zabotonon. Ni bila slaba ni Mirandica, samo je jimela jeno falo - ni bila, brižna, verđina. Za tô je znala i njejna mat, pak je bila jôko kontenta kat se je Franić namoro na njejno Mirandico. I kat so se uženili za prvo nôć tîte Bepina je, da nanke hći ni znala, pot kušin klala jeno velo rumeno jabuko, oš tak je bilo i kat se ona pret tristi lit zakonila. Kat so navecer šli prve noći va kamaro, ona je na skriveć sia zat njimi i stavila uho va kljucanico da bi cula ca će ot sega prit vonka. Ni pasalo termene deset minuti a brižan Tonić je pot kusinon noša jabuko. Zagriza ju je zajno i pokle tega kontenat zavôpi:

- Aj, mat moja, tako velo neson još nidar jime va rukah!

Kat je to naša Bepina cula pret vrotami, zajno ni je palo na mente na bojžega maškića met nogami, pa je sa prestrašena zavopila:

Ni ne Franić, tô ti se parô, oš smo sî mi ot raci širokeh kosti!! 

52

BAKALOJ

- Tonić znôš, forši, zoc tako trdo tuku bakaloja?
- Vero neznôn.
- Štupido, da pravi kede mu je glôva! 

53

OŠTARIJA

Naš Tonić, poznateji koko Toni Bevonda, ni se ot oštariji vrnu se do škurega, pa je njegova Franica, jôdna koko brek, šla pônjega. Barnô ga ona, siromaha, veselega ot oštariji i da je mogia, zajno bi ga bila zadôvila. Sa dešperana, ona mu dî:

- Ne moremo mi tako poc više napret, moj Tonić.
- S tobon son dakordo - rišpondi Tonić - pak tarnojmo se zajno va oštarijo!" 

54

BLAGO JE

Za vo prave da se je zasprôvega potrefila. Alora, mlöda Labinjonka prežentô jenega dneva svojega mladića, ka ni bi ot našeg kraji, nego je priša ot gore. Kat ju je nôna pitala koko se njejni mladić zove, mlöda Labinjonka je svoje nône, ka se je rodila još va one prve gvîri, rišpondila:

- Blagoje.

Nòna, koko da ni dobro cula, pak je i drugi put pitala, a nuka je i po drugi put sejno rišpondila. Kat je i po treti put pitala, nuka, već nervôža, zavopi malo forteje da se njejni mlodi zove Blagoje.

Sada je i nôna malo dignula glôs, pa ni dî:

- Znôn, znôn da je blago, ma reci mi finalmente koko se zove! 

55

CARINA

Tarniva se tîte Mica ot Trsta, kede je bila na banke po talijônsko penzijo. Na kunfine jo je doganjer pito ca je kupila.

- Lepi moj šlovek za sina son kupila brageši, stomanjo za muža, neke cavati za suseda Tonića, a za...

- A za carinu? - nervôzno jo je prekino doganjer.
- Vero nic lepi möj šlovek. Jedini mi, vero, ni reka da cagodar moran kupit i za vas!"

56

OBRAZ

Prvo nego ca je mlöda hći šla ća ot kući, služit po ljuškeh kućah, mat ni je rekla:

- Lepa moja hći da bi se cuvala va velen grôde, oš te tamo more cuda grdega potrefit. Najveć beži ća ot muškeh, oš oni so nic i lahko bi te mogli prevarit. Gvaj da hi zameš va kamaru i da se, nedaj Bôh, naprte nôte, oš ćemo kune i ja i ti zgubit obraz.

Hći je natô rekla da ni je se côro i neka samo ona spi na mire. I porti ona va veli grôd služit po Ijuškeh kućah.

Pokle nekoliko meseci hći se tarnô sa kontenta i na domando koko je va svîte pasala ona rišpondi:

- Vero mi je trdo lîpo i nic mi ne fali. Jiman i mladića i jôko se jimamo radi.

Natô je mat, koko oparena, pita ko je zôbila ca ni je ona rekla kat je šla ća.

- Nanke besedo, draga moja mat. Bilo je se deboto ono koko si mi ti bila rekla. On me je pozvô va kamaro i son šla. legli smo na pusteljo, ma mama da znoš, ja son se naprtila nònjega, tako da on, njegova mat i otac, a ne mi zgube obraz!!!

57

VA ČINE

- Da si zajno vine te ruki z mojeh kolena!
- A, kamo da hi klôden?
- Štupido, ca ni tô ne znos?! 

58

BORBA

Prave da je jedon Labinjon bi va Varaždinskeh toplicah i da je osto prez beci, oš je više pi vino nego vodo. Ni mu bilo nic drugo za napravit nego da napiše letero nećoku neka mu prnese beci va Zagreb, kede će ga cekat. I tako se naš siromah prez zrna soldi va žepe uputi na stacijôn va Zagrebe. Kat je tamo prîša cu je da je neki vôpi:

- Borba, borba!

Sa kontenat da mu je nećok već priša, se zaputi tamo kede je cu ona glôs. Ma, kat je tamo prîša ni noša nećoka, već onega ka je prodajeva đornali "Borba." Pokle tega ni ote više za urto lejit ti foji! A 

59

ZÎKVA

Naš Tonić pride doma malo raneje nego ca se petehi zbude. Da ga ne cuje žena, ka ga znô trdo sramotit i oprat, Tonić je hodi pomalo naprstah. Va škuren bugne va zîkvo. Na tô se njegova žena zbudi:

- Ca delaš Tonić?

- Marijica moja, son sedignu da malo zibljem zîkvo, oš naša môla nikakor da zaspi - će se on parvat šalvat.

- Štupido, nopet me kojenivaš. Ca ne vidiš da môla spi z manon!

60

ŠPÔG

So se uženili Ive i Marija, pa pridu va kamaro pret pusteljo.

- Ive moj lepi, znôš da ne moren poć na tako visoko pusteljo.
- Marijica moja, ni strôha, ćepoj se samo za môj kljin.

 I takoje bilo.

Drugo jutro Marijica se otela dignut, ma je jimela strôha skoknut z visoke pustelji, pa će Ivetu:

- Ive moj prelepi, kede ti je kljin da gren dole?

A Ive, sa parkinjen, samo dî:

- Marijica moja, niga više. Nego tu ti je špôg, pak se z njin kaloj!

61

KLJUC

Pride Tonić jene noći trdo vesel doma. I kladiva on tako jeno pôl uri kljuc va kljucanico, ma ni moga potrefit. Na tô poli kući pasô policijoto pa ga li pita ca tô dela.

- Nic, vero nic. Nego, bilo bi bolje da mi malo držiš kućo da mi se više ne limba, koko bin moga klas kljuc va kljucanico. 

62

PIKET

Jenega jutra komisija ka je trebala trasat prugo Lupoglav - Štalije gre za ften da je neki vine piketi. I tako pitajo oni sakega ku so videli ti piketi, i ma si so, puni strôha, rišpondili da neso. Na tô se jovi jedon otrok, rôba ot pît-šîš lît ka rece da znô. Koko je bi jôko môli neso ga oteli ni poslihat, ma kat pokle toliko ur ni jedini zno, pridu oni nopet poli njega. A on će reć:

- Son vide koko je vaš đometar kladiva piket va tarbuh ot naše tîti Mariji!

63

PETEH

 - Sipe - rece Franica svojemu mužu, jutre će bit 25 lît da smo se zîli, se spametiš, a? Ca ne bilo lîpo da ćepôš onega većega peteha i da mu zavrneš vrot.

- A zoc lepa moja Franica - će na tô Sipe, tr ni on krif ca smo seh uženili?!

64

ZBALJA

Posudi suseda ot susedi dvî joja. Pokle mesec don po svoje môle vrne samo jeno.

- Ma lepa moja môla, ja son van dôla dvî joja, a ne jeno - će suseda.

- Aj, vero jimate pravo. Bit će da je moja mat žbaljala kat hi je brojila!

65

ŽENA

Vajka pijon Ive jene noći pride doma, ma ta put žena mu je mucala. Ca bi tô reć - zapensô sanbreceć naš kumpare i zavopi na ženo:

Mala, ca me nećeš veceras malo sramotit, kune neću nidar noć to vrajžo pusteljo!

66

BARETA

Se je prôla nôna gola, a na tô kapitô môli nucić i je pita:

- Nôna, ca tô jimaš met nogami?

A nôna će na tô:

- Bareto!

A nucić ne muci:

- A ko môlo bareto jimaš!

Na tô se nôna razjôdila, pak mu je oštro rišpondila:

- Ki će vas vrah seh kontentat? Nôno se tuži da je prevela, a ti da je mića!

67

JIMAŠ PRAVO

Gona sused susedu:

- Moja je žena trdo dobra va pustelje!
 - Jimaš pravo!

68

GOSPODOR 1

Priša je Tonić doma malo pot gason, pak, koko je dobi tantin kuraja, bugne po stole i zavopi:

- Ki je gospodor va ve kuće?

A njegova dobra ženica, ni dvo ni tri, zamelje mu jeno tresko. Na tô će on:

- O va, ca se šlovek ne smi nanke škercat?

69

GOSPODOR 2

Svadili so se Tonić i Marijica, pak ga je ona pošnela tuć z metlo i teć po kuće za njin (ca vas tô ni nidar potrefilo?). Ali šegof muž se ni dô, već je uša pot pusteljo i kuce koko mucak. Ma, dobra ženica ni ga ni tamo pustila na mire, nego ga je badala z metlo i gonala:

- Ćeš poć vonka, ćeš poć vonka oli ne?!

A siromah muž se ni dô, vež, pun sebe, rišpondi:

- Ne, ne gren vonka, neka se vidi ki je gospodor va kuće!

70

KUMPARE

Sin, rôba ot petnajs lît, jene veceri zapita svojo mater:

- Mama, spametin se koko danas. Kat son ja bi mići ti i ćaća ste se svadili navecer, ma sako jutro ste nopet bili preteli. A, sada kat se svadite ne gonate i po dvi šetimôni. Zoc je toô sada tako?

- E, moj sin - zdahne mat, i ja se spametin teh lepeh dnevi. A danas je tako, oš je umra ona ka nas je miri!!!

71

PRASICA OT TAŠĆI

- Toni, kamo greš z vo puno boršo nožići?

- Gren zaklat ono prasico ot moje tašći!

- Ca si munjen, ca tô delaš?

- Munjeni ste vi ca van sacega pada na mente. Ca moja tašća siromaha ne more jimet prasico?

72

BÔH

Šo je zvonor na funerol, ma mu je korijera ušla, pak je mora vituri farmivat. Puten mu je farmo pop. On je, pak, peljo koko šajeta, pa je stori zvonor bi sa strenjen. Zat ten je šo pop, pak mu je reka, da bi ga malo smiri:

- Nemojte jimet strôha, Boh je z nami.

Natô će zvonor rišpondit:

- Ca će nan Bôh, kat vrah jima ruki na timune!

73

GUMARIĆI

Barba Tonić je dugo penso koko bi se držala njegova žena i deca kat on spusti dušo i porti na ona svît. I zatô on jedon dôn napravi finto koko je kubile šo vrit. Pridu Ijudi ot seh bondi, neki plôcu, drugi muce, neki donesejo i ko boco oli kafe, a njegova žena, koko bi bi i rîd, obuce se va crno i pošne narekovat. Bila je crna koko vrah. I tako pride ura da Tonića preobucejo. Konjôda mu je nošla jedon veštit, najbraveji va njegoven armarône, pa pita ženo ko ce ga va njega obuć.

- Nikakor moja Tonina. To mu je bi najbolji vištit, a na meru je mojemu najstarejemu sinu. Kat već tako i tako mora portit na nebo, bila bi škoda da ga zakopômo va njin. 

I brižnemu barba Ivetu so nošli neko stôro trenirko ot sina i va nju ga obukli. Sada so prišli na rîd postoli, ma nopet njegova dišperana žena ni dôla da ga se zakopô va najboljeg postolah, oš so novi i na mero so najmlajemu sinu. I tako je fini na nekeh gumarićah. I kat je bi tako lîpo po "sportski" obujen, žena se klôde nat njin i pošne na velo narekovat:

- O moj lepi Tonić, kamo si mi se ti zaputi, Tonić môj lepi!!!

Natô se Toniću, pokle sega, važgala pipa:

- Koko ste me tako šesno obukli, se mi se parô da ćun finit na Olimpijade, ženica moia šesna!

74

PAPIGA

Pride labinjon na đito va Zagreb, pak je šo videt beštiji va zoološken vrte. Joko mu se je zapježala jena lepa papiga, pa je na glôs zavopi:

- Ka lepi tić!

Natô ga papiga lîpo pogleda i pak rece:

- Dobar dan!

Labinjon se je natô trdo zaštupi, deboto i inkantô, pak mu se pošne skuživat:

- Skužojte, skužojte, ja son vero penso da ste vi tić!

75

ZÎC

Ćepali so Labinjon i Vlah zîca nasret raškega mosta i nikakor da se nagode ot kega je. labinjon će reć Vlahu:

- Si dakordo da zubima držimo zîca i ki je forteji ot njega je zîc.

Vlah ni jime nic proti tega. Pokle nekoliko minuti labinjon skrôz zubi pita Vlaha ku drži zîca. Vlah opre usta i zavopi:

- Da!

76

ŠLA VONKA

Va oštarije va stôren grôde za sejnen stole so se nošli labinjon i jedon furešt. Pokle pôr polici met sobon so pošneli i gonat koko da se poznôjo ot vajka. I ki so, i ca so, i koliko dece jimajo, koko so nin veli nuki, koliki nin je penzijôn, ca hi vajka boli i još ca se ne. I kat so prišli na ženi, novi pretel ot labinjana će reć:

- Znaš da je moja žena Slavonka!

- Anke moja je zena šla vonka, je rekla da će zajno prit, ma još je ni!

77

JOJA

Va se je potrefila zajno pokle oslobođenja na markate na Poce. Joja je prodavala jena ženska ot sela, ka ni znala nanke besedo po talijônski. Ta je, pak, joja kupivala šinjora, ka ni znala vlôsa po nase. Kat je po šinjora pitala po cen so joja, samica ni je rišpondila da so po kvarnor. Koko šinjora ni dobro kapila, ona je ponudila pedeset dinar, oli deset dinar vec! Koko ni ni kampanjôlka kapila, rišpondi ni da hi ne more dat spôda kvarnor. I tako pôr puti, dok se finalmente kampanjôlka ne štufô i jôdna zavopi:

- Cinkvantoj, cinkvantoj, ma spôda kvarnor ti hi ne prodôn."

78

LETA

Jena šesna mloda z Labina srela je na Cerće jenega starejega šloveka, ka je bi pretel ot njejnega oca.

- Barba Tonić vero se jôko lîpo držite. Koliko je lît zat Vami?
- Cera son fini jušto 65!
- Ma, vero nebin van dôla!
- Da i biste vragu bolje kat više neson kapôc.

79

POLI BARBIJERA

Priša Bepi poli svojega pretela marangôna i lîpo ga zaprosi neka mu va glôvo zatuce jedon veli coval.

- Nanke mrt nebin ti tô stori! Ca si munjen?! Ki ti je vrah?!

- Zatuci i ne pitaj me nic više oš son štuf saki put kat gren poli barbijera da me grdo ošîška. Zatô neka si finalmente oskubi makino za šîškat!

80

PROMART

Kumpare Franić fôli se je susede da je kapôc po udore poznatsako žensko ka bi mu dôla. Suseda, zat ko somci neso nidar preveć tekli, puna šperonci će ga pitat:

- Franić ca biš pravi zôme?!

Franić je malo pounjô i di:

- Kuma moja, ti vero ne biš.
- E, moj Franić, bit će da si veceras trdo promart!

81

MLODA

Šia je labinjonka prvi put va tanac. Drugi je dôn mat pita koko je bilo.

- Lepa moja mat bilo ti je tako. Pokle pôl uri po mene je priša jedon mladić zvat me toncat. Muci von, mucin i ja. Malo za ten me je zi za ruko i potignu vonka pot jeno kopo. Muci von, ma mucin i ja. 

Tu me je poce najprvo gladit, a pokle i sucivat budonti. Muci von, mucin i ja. Pomalo se pošne i prtit nôme. I muci von, mucin i ja. I prokljeta ja bila ku don danas rivôn kapit ca je von ute, lepa moja mat!

82

MA JE ŽILAVA

Na velen moste za Rabac jedon mlôd šlovek riva starejo žensko preko zida. Siromaha starica se je sa so förco držala za zid da nebi finila pot moston. Va ten momente z vituro pasô jedon šlovek z Rapca, ka se je zajno farmo kat je vide ca bi mogio starico potrefit Jôdan pošne vopit na mladića da ca je munjen i neka zajno pusti starico na mire.

- Ca se mešate va ljuško delo? Hote ća i pustite me da regulôn neki racuni z mojo tašćo - rišpondi mu mlôd šlovek!

- Orki Bôh, ma je žilava - dî kalmo Rabacan prvo nego ca je porti ća.

83

LÔSCAR

Vo smo culi poli mîdiga.

- Šjor dotOr, ca ćun se lovit? Saki put kat son na kampanje pride mi želja da gren sa ženo, ma kat priden doma nic ot tega. Ca da storin?

Mîdih mu je špjego neka sa sobon zame puško već kat je lôscar, pa neka saki put kat mu pride želja hiti tir vajer. Kat tô bude cula njegova Marijica zajno će doletet na kampanjo.

Pokle mesec don pride nopet poli mîdiga.

- Koko gre - pita ga on.

- Po vrajže! Se je dobro funcionalo dökle se ni opra lôf. Ot onaput ona tece na se bondi na keh se hita!

84

PîS SOLI

Kontreštivali so se mîdih i veterenarjo kemu je težlje

- Tebe je puno laglje nego mene, oš šlovek ti saki puyt rece ca ga boli. Mene krava ne more pravit ca nej je - dî veterenarjo. Šli so ća, ma neso se složili kemu je laglje.

Setimôno kašneje šinjora ot veterenarja zove mîdiga da ni je muž bolan. Mîdig zajno pride poli njega i pita ca mu je? Veterenarjo je samo pošne zgudat koko krava. Mîdih ga i drugi put pita ca mu je, ma ot veterenarja ni glôsa, i kat je vide da ni fina, rece njegove žene:

- Šinjora, dajte mu pîs soli i ku mu ne bude bolje, na macel z njin!!

85

FUNEROL

Kat je Môte vide jedon veli funerôl zajno je šo zat kaso da bi jenega šloveka pito ki je umra.

- Vero moja tašća - di ta šlovek va crnen. Siromaho, ujo ju je brek!

- Ćo, biš mi proda tega breka? - pita Môte.

- Bin, ma stavi se prvo va ono velo filo ku ćeš prit na rîd za ga kupit!

86

DA SI MI TI DOMA

Plôce Tonić nat groben ot svoje pokojne ženi:

- Ženica moja mila, ca bin se ja dô da si mi ti nopet doma!!!

Natô se je na grobe pot zemljo movi jedon hrt, pa se je zemlja dignula. Tonić je malo zusto, digne se zajno i z nogon zamasti mesto kede se je zemlja digivala, pa zavopi:

- O va, ca se šlovek s tobon nesmi nanke škercat?!

87

MUŽ OT MOJE ŽENI

Tonić plôce na grobe va labinsken cimitare. S njin va kumpanije je bi i njegof pretel:

- Zat ken tô toliko narekovaš?
- Pot vo zemljo je prvi muž ot moje ženi.
- I zat njin pustivaš suzi, ca si munjen?
- Ja, ja, da je on današ žif, ona nebi bila moja žena!

88

LIVO

Napi se je Môte koko mina, pak je zaspa va jenen kanole. Pokle jene uri nošli so ga njegova dvô pretela. Koko so pensali da je mrt, siromaha so dignuli i pošneli no$it doma. Kat so prišli na jeno kružero, neso znali na ko bondo poć. Môte, kat je malo priša vôse, deboto zdahne:

- Dok son ja bi žif son vajka hodi na lîvo!

89

SUPAT

Pride Labinjon na Vlašijo mokar, židan i lacan. Va jenej kuće so ga pitali ca bi raji vibra: pît, jes oli osušet se. Siromah labinjon rišpondi:

- Dobro, već kat moren vibrat - ja bin supa na ugnjišće!

90

KRAVA

Zvône se uputi na samonj va Sveto Nedeljo da prodô kravo perke je bila jôko stôra. Ki so ga culi, prave da je voko vôpi:

- Ki će kupit kravo? Jima dvajsti lît, ni više za mlîko, ni više za peljat, ni za telci!

Kat ga je cô pretel ca vopi, ćepô se za glôvo i zajno se zaleti poli njega:

- Ca si munjen Zvône? Ko tako budeš vôpi, nidar nećeš prodat kravo. Pusti sada mene, pa ćeš videt koko se dela. I pošne vopit:

- Ki će kupit kravo? Jima pît lît, dava dvajsti litar mlîka na dôn i dvô telci na leto!!! 

Ni pasalo minuta i zajno je poli njih prišlo puno Ijudi ki so oteli kupit voko dobro kravo. Kat je se tô vide Zvône, ćapô kravo za spažić i više zôse rece:

- Kat je tako dobra vero je nećun prodat za jedini beci!

I porti z nju nopet doma.

91

NEVIRA

Mornor se z puta tarnô z jeno lepo papigo. Koko je vajka bila met mornori nju je anke pježalo pît, humat i - kljet. Se je bilo dobro i si so se z nju smijali, dok jenega dneva ni va kućo priša pop. Kat je pret njih pošnela trdo kljet mornor je je zgrabi, klo va gojbo i förto zavrte. Kat ju je poklE tega vine vonka, ona sa šempijana zakreci:

- Orki Bôh, ka vela nevira!!!

92

FREŠKECA

- Toni, ca so ti freške ve lukordi?
- Ca ne vidiš Marijo da so još žive?
- I moja Marijica je još živa, ma ni više freška!!!

93

DIFERENCA

Pride jena trdo lepa mloda polj jenega labinskega mîdiga.

- Drug mîdih, grlo me jôko boli!
 -Sucite se!

Pokle nje va ordinacijo pride jena samica ka se ne spameti kada je bila mloda.

- Ca je vami, šinjora?
- A, mîdih moj, vero me se fanjski boli!
- Dobro, dobro, pokozite mi zajik.

94

KLABUKI

Va trdo môlen kvarćere môli Ive je poci ocu j matere saki put kat so oteli delat one stvori. Da bi se ga liberali, saki put so mu rekli neka gre na barkôn i neka broji Ijudi z klabukami, oš da će mu za sakega dat jedon dinar. I tako je mići Ive vajka jime beci va žepe, a bistar koko je bi, zno je ca va pustelje delajo otac i mater. I tako, kat so ga jene suboti nopet poslali na barkôn, Ive sa kuntenat zavopi:

- Ćaća i mama, va put će vas pustelja jôko puno koštat, oš pasiva funerol!!!

95

PREŠA

Sipetova tašća leži na pustelje pronta za portjt na ona drugi svît. Va kamaro z njo je i Sipe, s ko on ni bi preveć dakordo, pa nikakor da sceka da Bôh pride po svoje. Siromaha ženska, s jenô nogo već va roje, komić opre usta:

- Da mi je još samo videt mojo hćir Marijo, pa moren umret.

Sipe, a tô je bi njen muž, zajno je zavopi, a koko ni va sejni hip prišla, zazija nônjo:

- Marija, Marija kat si potrîbna tebe nikat ni!!!

96

TRENING I PARTIDA

Frane je ot vajka bi munjen zat samicami. Prez njih ni moga nanke kat se je uženi, pa je ženski kambjiva već nego drugi stomanji. Segof koko je bi, on ni nidar zapusti svojo ženo, s ko se je na gusto vide hodit na braceto. Kat ga je pretel pito koko mu gre zat ruko da so mu i žena i amante kontente, on je rišpondi:

- Ja son ti koko dogadôr ka mora vajka bit pront; preko šetimôni jiman treningi, a va nedeljo je partida!

97

DREVENA RUKA

Cula je Marija ot Luceti da ona stvor, kat muški pišòjo, kreši ko se ga pokle trdo trese. Kat se je doma tornala, sa kurjôža je cekala da gre njejni Ive pišat. I kat je, pokle litri belice prišla ura da gre molat vodo, Marija je šla za ten da ga ni preveć stresa. Sa jôdna na njegovo "zobljivos" Marija zavopi zat njin.

- Ive, ca bi ti se ruka odrevenela da si ga malo više stresa!?

98

CRNI KONAC

Bîpetu je umrla tašća i on se sa kontenat zaputi kupit ròžice za zadnji put.

Butižerka: Ca ćete široko oli usko kordelo?
Bîpe: Zoc me pitate?
Butižerka: Ko ste kega jimeli radi kordela je široka, a kone je uža.
Bîpe: Šinjora, jimate forši malo crnega konca?!

99

KALANE BRAGEŠI

Toniću žena šla va ošpedol, pa koko mu ni ki jime mus kravo Vijôlo mora je tô pošnet delat sôm - prvi put va svojen življenje. Pošne on delo z velen rešpete i kat je verva da gre po dobren - krava ga je bugnula z desno stražnjo nogo. Ni bilo druge nego da ni nogo veže za pal. I pošne nopet mus. Ma, ne za dugo, oš ga je sada bugnula z levo stražnjo. Ćepo se je nopet za špôg i stori je ca je jime za storit. I hiti se, nopet, sa mucan na fadigo. Kat je paro da već ne more žgarat, Vijòla mu je z repon so mlîko prolila. Jôdan koko brek, spravi se da ni veže rep za grîdo. Koko više ni bilo špôga, ćepô se za pôs ot bragîš, i fini delo. Va ten momente brageši so mu zajno pale i jušto va ten hipe pret njin i kravo se nojde sused Morko.

- Tonic, ca tô delaš!
- Morko, ku ćeš mi vervat oli ne, muzen kravo!!!

100

KARAK

Va jene oštarije va Vineže, bit će da je bilo poli "FM", igrôjo briškulo va pôre Sipe i Môte. Sipe je bi braveji za igrat, a koko je Môte na gusto žbaljiva, Sipe je pridiva se jôdneji. Pôr so si puti deboto pomešali klabuki, a kat je Môte na kraje krivo kapi Sipeta, pa hiti karika ća, on mu je zatuka jeno pîs met rogi. Siromaha so zajno pobrli sa karčeroso na Dom zdravlja. Kat je mîdih vide ca mu je storeno, zavrte je s glôvon i reka da će tu morat pas jeno pôr punti. Sa prestrašen Môte mu rišpondi:

- Dajte hi koliko ćete, samo da ni karak!!!

101

KOKOŠI I JOJA 

Ive: Tite Marija, me je poslala mama ku bi te nan posudila jeno pôr joja za nasodit kokoš.

Tite Marija: Vero bin sin moj, ma koliko se ja spametin vi ne držite kokoši. 

Ive: Vero jimate pravo, ma jušto sada mat je mojo sestro poslala poli susedi ku bi ni posudila jeno kokoš!

102

VOL

Šo Labinjon va Meriko i pokle nekega vremena se je oženi za jeno Merikonko. Sa kuntenat će pisat doma svoje matere:

- Lepa moja mat mi smo si dobro, a lîpo krešiva i tvöj nuk John. Već jima tri meseci i lep je koko bonbôn, samo je malo škureji nego ja, oš moja Mary nima mlîka, pa ga doji jena crna dekla.

Pokle mesec don mat mu je rišpondila:

- Lepi moj sin trdo mi je drôgo da Van je dobro i da môli lipo krešiva. Kat smo već poli kôlôra ot tvojega sina moran ti reć da ni ja neson jimela mlîka kat si se ti zlega. Zatô son te dojila z mlîkon ot kravi, pa mi je sada côro zoc si vonka priša tako veli vôl!

103

ZA VAJKA

Šo Franić prodat stôro i jalovo kravo na samonj va Sveto Nedeljo. Pret nôć se je tarno doma. Kat ga je cula žena Bepina mu je z barkôna zavôpila:

- Franić ca si proda Belino?
- Vero son Bepina!
- Za koliko?
- Za vajka!!!

104

AMOR

Vo smo culi jene noći va jene kamari ot penzijonati kemi je prišlo da delajo one blagariji.

Tonić: Marijica, je šo nutra?

Marijica: Vero ni!

Tonić: Ma, poli kega vraga je šo finit?! 

105

HORTA

Tonić i njegova žena Marija so se svadili i neso gonali sedan don. Osmi dôn Tonić je treba poć na vijač, pak je žene na jene horte napiso:

- Marija jutre gren va Zagreb. Zbudi me na cetire ur!

Drugo se je jutro zbudi na šîs ur, pa ot vijača ni bilo nic. Jôdan na ženo obrne se prema žgabelje ne kemu je, kat je opra luče, noša jeno hortico. Na nje je pisalo:

- Tonić, digni se, cetire je ur.  Marija 

106

NIGA BRIGA 

Sipe: Ca te ni stroh, Môte, da će poli nas pošnet gradanski rat?

Môte: Nanke malo! Ca si zôbi da ja stojin na sele?

107

BILJET

Zajno pokle oslobođenja kôvari, ma i seh drugeh, po našeh su selah peljale kôvarice - bi reć kambijôni z predelanami kasôni. Va prveh lît ot socijalizma se je bilo za nic, pak na korijere ni bilo nanke biljetarija. Oni so se na korijeri naprtili konpena pedeset i nekega leta. Ljudi, koko Ijudi so se lako navadili peljat prez plôtit, ma na biljetarija već malo teže, pa so se ugibali pret njin kat je trebalo storit biljet. Prave da je biljetariju Jôčetu bilo teško uć, oš je on bi trdo pošten šlovek, a i njemu se je paralo da ni moga saki nosit onoko lepo bareto z frontinon. Kat ju je klo na glôvo koko da je i drugi šlovek!

Jedon se dôn tako doma z labina va Sveti Martin tarnivala i njegova žena Ivanina, s ko je malo prvo tega bi na sude zaradi kanpanji. Kat je priša poli nje, namesti si bareto, ćepô se za boršico z biljetami, pak je na sa glôs, da ga si cujo, zavôpi:

Ivanina, kamo greš ti?

108

POP I DUGI

Ive je bi dobar šlovek koko kruh, duši mehke koko bumbok, a delovac kokovega je trebalo iskat na dugo. Samo je, siromah, jime i jeno falo - pježalo ga je kljet, anke polić dobrega, pa ploća na gusto ni rivala ot kvindižini do kvindižini. Stori se je tako duh va oštarije, a i žena mu je kupivala na duh poli Zuljôna, ka je jime butigo ot jes pot Tôlijo. Za jedon blagdan Ive se je noša poli popa va crekve va Sveten Martine da bi se spoveda. Pop ga pita ku kune, a on rišpondi da jo sako toliko, oš da mu ujde. Na tô mu gospodin dî:

- Ive, Ive treba se cuda molit, oš smo mi dragemu Bogu cuda dužni!

- Z Bogon ćun već nekakor namirit dugi, a ma sa Zuljônon neće bit nanke malo lahko - zlamena se Ive katse je spameti ca mu dušo najveć pretišće.

109

JUROJ -TITO

Miljordevetstôpedesetitrete, kat je bila ona barufa vôkole Trsta, na Crće va Labine je deboto saki dôn bi ka veli miting. Na njih so prihajivali ljudi ot seh selah Labinšćine. Deca ot rudarske škôli, keh smo zvôli rudarići, so toncali "širi kolo" i va oneh blu tarližah na ramenah nosili svojega diritôra. Jedon dôn na jenen takoven mitinge je gono diritôr ot Raši da bi ta put spomenu i Tita. Ljudi so ga prekinuli, pošneli pljeskat i vopit: Heroj Tito!!

Na mitinge je bila i jena naša samica ka je cîlo vrîme vopila:

- Juroj-Tito, Juroj-Tito!!!

Siromaha ni znala ca je tô heroj, a kada ju je kunpare naputi da treba vopit heroj, a ne Juroj, ona mu rišpondi:

- Aj, vero neson znala da Juroj ni više va našen odbore, da su i njega kambijali?!

110

SPOVED 1

Poli popa va crekve prišle so se spovedat tri Labinjonke. Kat je gospodin prvo šinjoro pito koliko je puti prevarila svojega muža, ona mu je rišpondila da je, ma, samo jedori put. Natô ni je on rišpondi da za kaštih mora storit jedon đir vôkole kampa. Druga je Labrnjonka zasluzila dvô đira, a kada je se tô videla treta samica prave da je zavopila:

- Brižna ja, moran pöć doma po bicekleto!

111

SPOVED 2

Kat mu je prišlo za umret jedon Labinjon je pozvô popa na spoved. Prave da se met njimi vodi vôkof diškorš:

- Ste prevari ka put ženo?
- Son moga dvô puti, ma neson!
- Kat je tako zasluži ste dvî krbi sîna!
- Zoc gospodin plovon?
- Oš ste se držo koko tovor!!

112

ROGI I ROJ

Deštin je bi da muž i žena umreju jedon za drugen. Najprvo muž, a koko je on bi dobar šlovek, njegova žena, ka mu hi je puno fabrikala, je racunala da bi on jime poć va roj, a ona finit va pakle.Kat je prišla na ona drugi svît se zaputiva roj, da bi još jedonput videla svojega muža. Pret vrotami je farmô Sveti Petar:

- Šnjora ca bi vi uteli?
- Bin radi videt još jedonput svojega muža prvo nego ca gren va pakol.
- Cekajte da ga nojden va mojen libre. Eko, eko ga. Još je va marangônije.
- Ca forši već dela koko marangôn?
- Ma ne šinjora, samo mu pile rogi da more pasat skroš vrota ot roja!

113

HUSO I HASO

Pokle ca so 15 lìt delali va kôve Husetu i Hasetu se skotelo da dobijo pašaport ot Labinske republiki. Ma samo prvo tega morali so pasat pret jeno komisijo i rišpondit na dvajsti domandi. Prišlo je i vrîme da pokožo ku znôjo plavat. Va môre je prvi šo Huso i otplava je na lahko stô metri, pa je sa kuntenat finalmente paso.

Brižan Haso nikakor da se suce, oš ni zno plavat. Će i neće, bi i nebi, strôh je veli, ma volja da dobije pašaport još veća, pa se na kraje suce va budantini i hiti va vodo. Malo za ten se pošne dôvit i sa prestrašen vopit Huseta da ga šalvô. A Huso, sada Labinjon z hortami va žepe, kalmo i kuntenat, najprvo ga je blîdo pogleda, a pokle mu rišpondi:

- Vrajža vas je korijera poli nas dopeljala!!!

114

 NA PUMPE

- Koliko kôsto jena kaplja benzini?
- Nic!
- Dobro, nakapljite mi jeno pìt litar!

115

 BUDONTI

Zove telefônom jena šinjorica ginekologa:

- Šjor mîdih ca so poli vas ostale moje budonti?
- Aj, vero neso!!
- A, dobro, dobro, će bit da so poli dentista!-