- Pelegrin, Pelegrin, stè qua. No stè 'ndar via, no stè!

E Piligrin:

- Qua xe 'sai bel, me piase propio; ma cavéme 'na curiosità, cavéme,… come ve conporté valtri intel caso che i ve meti in tola una minestra de bojo? Sti ossaresi che i no capiva, i se varda intorno e i tasi. Fina che un se ris-cia e, cola calada, come che i parla lori, el ghe dise, el ghe fa:

- Ma, noialtri spetéemo che la sejàassi, spetéemo.

- Bon bon, ve saludo - ghe fa el Santo - me despiase propio ma devo 'ndar.

El riva a Albona, no, e stesse feste:

- Pelegrin, ve volemo con noi par senpre, qua staré ben, Pelegrin!

E lu:

- Anca qua xe bel, xe… però se podarìa saver cossa che fè se la minestra la sbrova?

- Noi sufiemo! prima in piato e pò sul cuciar. - i ghe fa lori.

- Ben ben, ve lasso che i me speta a Pola! - ghe dise lora lu.

Pena ch'el xe a Pola, no, altre feste. E che feste!:

- Vu no dové più a partir, Pelegrin, dové restar con noialtri! Un piato de manestra no ve mancarà…

- A proposito de minestra, - ghe fa el Santo - e se la xe sbrovente, come la magnemo?

- La missiemo sguelto sguelto col cuciar… la se sfredissi subito! - ghe rispondi un polesan.

E quel:

Sto posto el xe propio na belessa! Me despiase solo che devo 'ndar, che se fa scuro.

Cò 'l te càpita a Fasana, no ve conto, no ve digo:

- Pelegrin! Pelegrin stè qua! Stè qua Pelegrin! Pelegrin!

E Piligrin:

- Per esse(r) bel xe bel! Mi digo che qua stè 'sai ben, mi digo, ma… una minestra de bojo, come la magnassivo vualtri?

-Noi semo usi de méterla prima un poco fora dela finestra. - i ghe disi lori.

- Ostregheta! Ben pensada! - ghe fa el santo - Se no i me spetassi a Rovigno…

Sbarcà a Rovigno, sti ruvignesi! - gavessi dovesto a sintirli:

-Piligrein, Piligrein, nu stè 'ndar veia!

E lu no, el ghe fa, el ghe dir:

- Mai visto un posto cussì bel,… mai visto! Ma steme a sintir, steme: quando che la manestra la scota, come se usi qua a Rovigno?

E quei:

- Ghe sontemo un cassiùl de aqua freda e la magnemo indrioman!

E Piligrin:

- Che insegno, ma che insegno sti ruvignesi! Bravi!

Continué cussì. continué, che mi 'ntanto vago vanti, vago.

E insoma el te riva a Orsera, no. Meno jente ma più feste ancora.

- Resté con nualtri, Pelegrin, resté con nu! E el Santo:

-Anca qua xe bel per star; ma pitosto diseme: cò la minestra la ve scota, cossa fassé voialtri? E un de lori:

- No savemo cossa respónderve, Pelegrin, par via che naltri la magnemo senpre freda, anca el jorno drio, parché la se infississi e cussì ne par che la tegni mejo sù el stomigo.

- Ben fata! Orpo! Se no gavaressi de 'ndà a Parenso… -  fa Piligrin.

Rivà che 'l xe a Parenso, banda in piassa e duti come mati:

- Pelegrin! Fassé che basti con sto travajo, fermeve con novaltri, fermeve:

- Con sta bela cesa - ghe fa lu - 'sai volentieri; ma prima me piasarìa che me disé cossa che fè se la minestra la ve scota.

-Ganbiemo piato. Anca do volte! - i ghe fa lori -

- Ghe farò un pinsier. - el dise lora lu - Savé cossa? Mi 'ntanto vago vanti, vago… E valtri speteme!

Co 'l te riva a Sitanova, duti in festa, duti in piassa.

El Podestà in persona a nome de duti i sitanovanti li fa, li dice:

- Pelegrino, noi volaressimo che Vu stassi con nu; che gnente ve mancarave mai più!

- Grassie siori! - el ghe fa lu - anca qua xe bel, proprio un bel logo, solo che me piasarìa a cognosser come che la magné, valtri, la minestra se la xe massa calda.

E el Podestà:

- Qua i usa a magnarla come che la stà, anca sbrovente. Ise ga bituà cussì perché i ga furia de tornar in canpo.

- Go ben che capì… esa che sufia sta bavisela, -ghe fa el Santo - no ghe fussi un pescador che me butarìa a Umago cola batela?

E cussì vien la volta che Piligrin càpita a Umago. Squasi nissun! Duti pei canpi a ingrumar volive. El Santo sa el pensava de tirar avanti drito, no; ma una vecia, colsial in testa chefevafredo, la ghefa, la ghe dise:

Omo mio, no sarìa el caso, benedeto Vu, che ve riposassi qualche jorno prima de tornar in viajo?

E Piligrin:

- Sto posto nol xe proprio na belessa, nol xe; ma diseme dona, sta gente, come i la magna na minestra de bojo?

- Una manestra che scota? - lo varda la vecia - Noi ghe sgnachemo drento tante sope de pan…fina che el cuciaro nol resta in pìe de solo!

E alora no, el Santo:

- Me despiase proprio pei piranesi che ghe gavevo inpromesso de 'ndarli a visitar! Mi qua son e qua resto!

I m' à la dita
Mi la go scrita
Cussì xe stà
Che 'l s' à fermà!

Raccolta a Villa Baldassi (Visinada) nel 1971 e trascritta in umaghese con la consulenza di Pellegrino Grassi detto Lepi a cura di Lauro Decarli (Carlón) caveresan (da Capodistria) come Giusto Almerigogna che fece i pupoli i quali però non sono stati messi nella prima edizione avvenuta su "Umago Nostra" n. 43 del dicembre 1995, pagina 6.