Bakin
S njin pojti u pašu bilo mu
je kako pojti na špaš. Još prije suncistoka je Bepo volar uštrigja vola
Bakina. Bilinka ga ka'j najvećega pretela; lipo ga pogladija mrež rogi,
vrga mu rese na voći da mu tiraju muhe i komre, postrigja rep i popipa
vide na dugih, bilih, i na dvi zavijole, rogi. Pogladi ga gospodar još
jedanbot po hrptu, ubajde dvi škafe zgor kušeti (sve su punije i
punije); vo se lipo rata, prihitija je deset kvintali. Najbuliji vo u
selu.
Bepo se čini. Bepove usnice gredu na
smih.
Tega dana ga je trata kako malo kada. Ce
bit da je ništo ćutija.
"Ča mi je da ga toliko tendin?", štupja
se volar.
- Kako se ja gostin, tako se i moj Bakin
gosti - povida je on.
Krma, za fešte boja, fešna. Ga je trata
kako sebe.
Grda su vrimena - ud kareštije, ladrije.
Ladri kredu na sve bande. Kumpanije i kumpanije ladri se skupja, slaže,
i kredu brižnin judan - ko ćeš vole, ko ćeš vovce, janjeta, kokoše,
intradu. Upjahnu sve ča dojde pod ruku. Najhuji su vni ča su špija i
kadina mrež kumpanijah. Takovih se čovik mora largati i strašiti. Ti
brbanti najhuje fate delaju.
Vela šuša, sedavnajstega lita, ustavila
je sinjale (maganja je zaresla, ma je sinja usta); tŕnke gode na dubi,
trdu koru i lišće. Dica zgojena u to vrime drobnija su ustala; blago na
manjoj nogi i mršavije; loze na tanken su ušušile, dubi po vrhi, prije
štajuna, zgubili lišće.
Za se primantinjati, Francika je bosa
pobirala, prašćala smrikvu i nosila bobice u bisagah do Pazina. Z
čentežimi ča je cepala kupila je robu ud harte. Na prven daždu bi se sva
raspala. Radić, konjska brada, rokula za napunit skledu. Hodilo se
brati, parat vaje pod beranisku valu.
- Jili smo luk z trukinjevin kruhon, pili
vodu iz Badavce. Vodu smo čuvali po cile noći... Ma smo vajk znali
zakantati, i bili kuntenti - domišlja se je potle barba Bepň.
l Bakin je koju kaštelanu vode zveza.
Bepo se torna sv6joj fameji i Bakinu iz
Galicije. Komoć je zvuka cilu glavu. Kus šrapnele ga ranija u nogu.
Prova je i giada i šenci. Naša je vola debulega i mršavega kako
škeletro. Tendija ga je i vo se brzo refa.
Dokle je bija kundanjan u pržunu, Bepo je
čuja di se dva pretela spominju: jedan pržuner, kundanjan "invita"', je
šapća vnen drugen kroz garmu: "Ti ćeš zvuci živu glavu, ja ću kosti tote
puštiti. Jedan šakret mi je na duši. Na Badavči, blizu bulaža, tamo di
vni manjiput gre u veći, na kružeri, zakopa san zlatne cekine u lonac ud
zemje. Ja se neću iz tuda zvući... pak ti povidan - raskopaj to i pomori
se. Kako ćeš jušto znati di je to? Sunce ria suncistoku hiti prvu zraku
na ti kus zemje. l na suncizahodu se jopet sunce nasmihne po zadnji bot.
To je najsigurniji sinja da je spod tega - dva metra dimboko, u jenen
koritu ud grote, u škrinjici za trima lokoti i u loncu od gline -
zakrijeno to bejato zlato..."
Cuja je šakret. Čin je doma riva, brzo je
prokura vit je li to jušto tako. Na ten mistu jur je sve bilo raskopano.
Niki ga je priteka.
A Bepo je buli kus zlata vidija u volu
Bakinu. Vo je blago šapjento. Sta bi na besidu. U njigoven milen voku,
Bepo se je zjutra gleda kako u špegju. Pň oblačnega neba se je stočilo u
te dvi krotke lokve. Vajk bi Bepo zna kad će tempura; Bakin bi digna
ćunku, pogleda u oblake i kratko zabuka. Ko bi se u falu zmočija, volar
ga je strja z vrićami i mu da teplega napoja z mekinjami. Svaku nediju
zaja je vola u najboju pasu.
- Gren van, gren ća, da me zalabo ne
najde doma - bi zna reći. Vo je torniva svejenon miron. Poslušno je
vrganj vuka u brazdi, koš vozija, zubatkiva. Moga se je Bepo i leći poda
nj - ni bilo pirikule. Nikakove vicije ni ima. Samo bi z desnin kopiton
zbreža, ko bi mu blizu došla žena u krovoj travesi eli z bareton
kolorderoža. Čuva ga je volar ud grdega vrimena, a već ga je čuva ud
ladri. Blago se čuvalo, ne da će pojti u škodu, nego već ud ladrije.
Samo ko bi se čovik malo larga, kapita bi kakov boja, zagrnut priko
glave z jaketon, namažen z uglenon eli žmiron po ubrazi. Merkali su
brbanti volare i pastire po pašah.
U nediju jutro mali je Stipić čuva blago
u Lokvanju. Nagha se na bok - jaketa pod njin - štijuć "Mladega
Istranina". Zaskreža. Glava mu se sponza na đorna. U hip vidi zgor sebe
sčrnjeni ubraz, ki se je nagna da vidi je li mali, morebit, zaspa.
Stipić zvikne. Digla se larma. Nikoji su zvukli pištole i rivolvere i
počeli hitati u ariju. Boška rebumbiva, a ladran ni glasa. Su se
splašili ti bot. - Ca, Bakin, u pober! Šu, pomalon!... Šti na mistu! -
su se kapili Bepo i njigov vo i na lihi i u paši. Kobi ga vo kojubot
razjadija, bi zvika proti njen: - Porko ja, porko ti! Porko ja i ti - i
bi šupna z bičon po ariji. U pomajču je bilo pasalo lito dan da su njin
ladri ukreli ćap ovac. Učinili su škuju na zidu, iz rudin, vaje do gred
(škuja je trefila jušto mrež grede, da ne bi se bila zrušila na nje).
Zgor jasla, na nego pokošenen se.nu, spa je Bepov brat Jure. Noć kratka,
tilo trudno i potribno sna. Spa je kako zaklan. Već boti bi se domišja
vrimena prije nego je doša bratu. l u sanje bi mu se zamišale te
štrofe... Ca ga je bilo tukalo? Juri je našila dežgracija. Gonija je
krave na vodu. Lokva zaledena. Krava se prti na led. Rastovalila se i
slomila nogu. Mati, jadna i nervoža, dala se na nj, da će ga finiti -
"fameju je zatrja"! Ud straha i vrgonje, uza je on jedan tavajo na
palicu, u nj zamota košuju i brageše, i poša "priko kunfina" - bratu u
Benečiju (iz Grofije u Benečiju).
"Doša san van u goste. Ma, ko van ne
zadivan, bin usta još koji dan", dužija je i dužija.
"Drugo mi se anka ne gre doma. Kuntenat
san tote. Pomoći ću van delati, vraćevati blago, kopat, vorat i sve ca
rabi."
Frma se poli brata. Nikad se ni uženija.
Dobar kako kruh. Finta, je bičve i maje pleja, kako nina ženska. l tega
jutra mu se sve to ujavi u pensiri. Vovac ni bilo kad se je ujutro
spuštija iz sena. Zapralo mu se u hipu da se nastavjaju grdi sanji ud
noći. Sunce z suncistoka mu se nasmihne kroz velu škuju na zidu.
Iskali su vovce na sve kraje.
Brzo je riva glas da hi je niki vidija.
Zaklatile su u jedan vrta, u broskvu, poli Pršutiće.
Marko se, za to ča je aviza, najija
makaruni z zecon. Magari sve vovce nisu bile na broju - falile su
četiri.
Potle ča njin se to sučedilo, ni bilo
dana da nisu čuvali blago. Jure je speva svakega štajuna na senu; u
jaslah kad je bilo ledenije vrime, da ga blago z sapon grije. Za trde
zime pokriva se z šaketunon i slamon. S njin je leža brek Karolina - i
on ga je jedan tikac teplija, z jene bande. Bija je to jedini brek koji
se je spretelija z prasicon. Samo je on moga dojti blizu kad se je
prasica uprasila. Leža je polida nju kako trinajsto prase. A kad su
svinju zaklali, preženta se njoj na hrbat i ni puštija pomagače da je
strgaju.
Najveć je Juri bilo gušt spati na mladoj,
nego pokošenoj, košnji. U susednen selu je jur sfalija jedan vo. Volar
frkalas zaja je vola u Brjuh i poša burelati na zjogo, poli Rabužinke,
mrež druge ragače. Torna se blagu potle par ur. Ma boškarina nideri ni
- šparja je. Nikad drugo nisu ga našli.
- Da bin po valora ud vola, samo ko se ne
najde, priko je, sakrabojski, ragač tradija našu divojčinu. Slipja je
je. Eko ti ga na - to mu je "batapercokula" - špjega je Martin pun
invidije.
Vidili su certi judi, goniti vola zuz
kampanju - ud Pjantadin do Strašnice. Grdi su se glasi širili ka'j
šajeta.
Bepo je sve štabelije zakračuniva i
zabarduniva svojega vola Bakina. Ima je navar da ga škuro ne najde u
paši eli kampanji. Vola je špara za glavna dela.
Vaje do razrušenih zidi starega grada
Kvarantasanti potega je jenega dana. Rabe mu kantunali za dvor. A tamo,
mrež gromačami, najti će grot lipih, uklešenih. Put je dug. Lavaju se u
dvi ure po noći. Š njin je poša mali Slavić da mu gre prid Bakinon.
Sunce je napro teplilo kad su rivali na Mirnu. Guncaju naprid do starih
razrušenih zidin i gromač. Slavić se štupi i gleda z širon doprtima
voči. Zidi zarešteni u bršjan, draču, jasen i grabar. Desetke metri
visok, strši u viške debeli zid. U sridini, dva zida zdurala su cila
ustat. Ud kad je to? Ud ke šekuli? pita se mici. l tote su judi živili,
i tuda su žive štope pestale, i tepla srca u nidru tukla. Tote su se
mučili, tote se veselili.
A sad samo vitar buče zgor gromač.
Na staremu grobju reste koromač...
Nakrgali su škalun kantunali i debelu,
velu škrilu - pokrovac stare tombe. Bakin se steplija guleći grote. Iz
hrbata se diže para.
Vela škrila ni nideri pasala. Colali su
je zuz trtoju. U prvi mrak, drugega dana, ušervali su na škrili bilo
jare - došlo je na prispanak. Nisu znali ud kud je, čigovo je, ni ča
je... Provaju ga ćepati. Nikako. Svaki njin je put ušlo, kako da je ud
magle učinjeno. Iz dana u dari, bi došlo i pošlo. Nikako ga ćepat.
-Judi moji, mi se pra da je to niki grd
sinja. Tornajte tu grotu di je bila do sada - putja hi je Zvane,
najstariji čovik u selu. Grotu su jopet tornali mrež gromače. Bilo jare
drugo ni nikad dohažalo.
Bepo je trepeta ud straha za svojega
vola. Slaboća je resla, ladrija se sve već širila. Ne samo siromahi, i
judi mogući, bogati, bili su upleteni u kadinu kreže. Ali u nje ni nidan
šušpeta, eli ni smija šušpetati. Moga je vo ukraden biti i deset dan
poli njih - nidan ga ne bi doša skati. Na kareti, pod slamon, moga se
privesti i cili prasac poli finance i karabinjere.
-Buon giorno, šjor Pjero!
-Buon giorno, kapo!
l su trankvilo pasali naprid.
Ud jenih bogatuni, ubili su ragača u
Vidorni. Karabinjeri u fermi. Misečina je svitila. Jedan se ladro zmaka,
drugi je zdaha. Lakodelci, niki vesejaki i kantaduri, ki su volili
kumpaniju, bilinkali su se i držali zuz ladre, da sebe i svoje blago
škapulaju. Certi su prodavali grampu iz bačav samo da skroz budu u diru,
da ča već doznaju i dovonjaju. Gravni ganci zmrež kumpanijami brbanti i
ladri.
Več šiti ud ladrije se zakotilo. Na
požicjonu teple krvi i kosiri oštrih lam, bilo je glavno gnjizdo te
nopačije.
Na mirakuložo znamenje bijega jareta
domislija se je Bepo u po pomajča, na kunat lito dan ud kreže ovac. Jure
je spa na pajarici, zgor jasla. Sanjiva je da se siri prihitivaju u
obruče. Zbudi se s prvima petehi. Samo ča ga ni kolpo čepalo! Vrata
dvora širon uduprta, barduni rashitani po pridrašću, lanta ud prtuna
udkrenuta... Bakina ni. Zašumi mu u glavi kako da će se, sada na, pod
njin škuja šundrati.
-Judi! Judi! Bakina ni! Hote pomoći ga
iskati! Smo zatareni! - viče Jure u svi glas.
- San zna ja da će ništo našiti; ni se za
nič ukaživalo bilo jare na škrili! - zajoče Bepo za svojin Bakinon.
Zvukli su zakrijene pištole, rivolvere i kremenjače i pošli ubahižat.
Sve boške, graže i vrhe ubajdu. Jedan iz kumpanije ladri utkrije harte
do po.
-Ho1e u Dragu. Ubajdite drugu stranu
vale. Mrež tinjanskega i beranskega mosta najti ćete vašega vola - hi je
aviza Zvane. - Samo to van moren reći.
Karabinjeri i lovci, preteli i susedi,
učine cili rašterlamenat, ud Tinjana naprid.
- Ki vidi kakov sinja, neka spraši tir u
ariju - pa je dogovor. Usnapali su i ustopičali gusto zareštenu stranu
ud Drage, hitajuć voko u svaku valicu, u svaku škuju i grm. Samo je
granje šuškalo zgor njih; vitar rashitiva oblake u koltrine i rancune.
Karaguju, visoko proti modrini, zatrepetala su skrajna pera na raširenih
kreli. Tir spraši u viške. Zarebumba.
-Judi, hojte riu bliže! San ga naša!!! -
svon sapon zvikne lovac Liberat. Naša je vola u srid najgušćih pedelini,
umaloj valici. Bakin je sve kolo sebe ustopiča, zbalega i zgloda trav.u
do korena, koru ud cera uruba.
Bepo je prekuntenat. Srce mu ureste ud
dragosti, samo lik manje nego na svati, kad se uženija.
- Brižno moje, siroto, blago! Samo kad
san te naša... - pogladi ga mrež velima rogi, pak ga prime za rogovile,
ka'j za manubjo. - Gajardo moj! - ga forto zdrma. Bakin je prenut. Na
liven mu oku visi vela suza, a desno se na tren nasmihne. Bepo se
pogleda u ten dragen, poznaten špegju. U suzi Bakinovoj stombula se u
travu kušćić sunca iz suncistoka. Pritrprja je Bepo i to ča je mora dati
Zvani po valora vola, samo da se on i Bakin još čuda vrimena kumpanjaju
po puti i boškah, po pašah i brazdah.
Bakinu su z vrućin želizon timbrali u rog
(ne kako prije - u kušet) lumer 144. Svejeni broj si je Bepo z kosiricon
uriza na portafojo i pas.
A kad Bakina drugo ni bilo, nosija je
Bepo vajk sobon kosir z manigon ud volovega roga...
Izvor:
- Tomislav Milohanić, "Bakin", Kalendar 1990 - Franina i Jurina,
Edicija Libar od Grozda (Pula, 1990), p. 163-6.
|