Roberto Stanich
Memories

La partida de balon

Co’ iero picio, de domenica mio papà me portava a veder la partida de futbal. Me piaseva andar, me fazeva sentir più grande e più omo, in compagnia de tuti omini. Dopo el pranzo, spetavo con impazienza che el Mario e el Bruno, due amici de papà, ne vegnissi a ciamar. Mia mama me meteva la bareta e la sciarpa torno el colo perche, per la più parte le partide iera de inverno e fazeva fredo a star fermi a vardar.

Per strada mio papà e i sui amici i parlava de la squadra avversaria e de la formazion de la nostra squadra e i fazeva previsioni su chi gaveria vinto. La squadra de la nostra cità no iera tra le più forti ma istesso la fazeva la sua bela figura specialmente quando che la zogava in casa e la gaveva el suporto dei sui tifosi. El più dele volte rivavimo al campo sportivo in anticipo e vedevimo zogar qualche squadra de muleti giovani prima de la partida principal. Iera bel veder come che 'sti muli se impegnava, anche perché i gaveva i parenti e i amici che li vardava e no i voleva far magre. Finalmente la partida dei muleti finiva e entrava in campo le squadre principali. I nostri zogadori i entrava corendo, tuti in fila con le maiete e le braghete ben lavade e stirade, acompagnadi dei incoraggiamenti dei spetatori: "alè muli, feghela veder, cinque gol volemo!". I se meteva de fronte al publico e i saludava. Dopo ghe tocava ala squadra aversaria e al arbitro con i due guardalinee. I capitani se saludava, i ghe dava la man al arbitro e le squadre se fotografava: una fila cuciadi per tera con el portier che tigniva in man el balon e un'altra fila in piedi de drio. Dopo, el arbitro tirava in alto la moneda per decider la posizion sul campo e chi che doveva dar el calcio de inizio. Le squadre se meteva a posto e l’arbitro fisciava el via ala partida. E nel stesso momento che el zogador ghe dava la prima piada al balon, i spetadori scominziava a zigar e a incoragiar la squadra: "forza muli, forza Pola, semo i più forti." Iera un divertimento, con tuti che zigava, chi per sugerir l’azion: "no andar de solo, passa avanti, tira, tira", chi per rimproverar:" No cussì, mona, al’ala ti ghe dovevi passar," chi per far comenti su questo o quel zogador: "cossa ti ga le gambe de seleno? Ti ga paura de farte mal? Cori, signorina." Ai avversari ghe iera riservadi commenti più forti come "castron, spacaossi, asassin, va a casa tua, arbitro butilo fora." Al’arbitro po’ i ghe zigava de tuto: ""endudo, beco, bucal, panza de vermi" e altre parole che in casa no se podeva dir ma che me tignivo in mente per contarghe ai amici. El più bel iera quando due zogadori in azion i se scontrava. Quel che cascava per tera el restava là, come morto, anche se nol se gaveva fato gnente, intanto che quel altro el andava in giro con i brazi verti e la facia inocente, come a dir: "No lo go gnanche tocado, el xe cascà de solo". Tuti che zigava, fina che l’arbitro no fisciava punizion. Alora, quel che pareva morto el saltava su come un saltamartin e el andava al tiro. Un’altra causa de discussioni iera quando che l’arbitro fisciava "opsai" (più tardi go imparà che xe una parola inglese che se scrivi Offside). Mi no go mai capì 'sto falo ma go avù sempre el sospeto che, come mi, nisun no lo gaveva capì, gnanche l’arbitro. Infati, le discussioni no finiva mai: "iera opsai, no iera opsai, l’ultimo omo iera avanti, no el iera indrio e cussì via." Ma quando che rivava el gol, se dismentigava tuto e iera un zigo unico de contenteza che se sentiva per tuta la città.

Dopo la partida, se gavevimo vinto, se fermavimo in buffet, vizin el mercato. Mio papà e i sui amici i beveva un per de biceri per scaldarse, intanto che i discuteva dela partida e a mi i me comprava una roseta col salame e una passareta.

Me piaseva el balon e la mia squadra iera el Grande Torino che in quei ani el dominava tuti i aversari e el gaveva vinto 5 scudeti de fila. Scoltavo sempre le partide per radio e conossevo a memoria i nomi dei zogadori. Me li ricordo ancora adesso: Bacigalupo (portier), Maroso, Grezar, Rigamonti, Castigliano, Ossola, Loik, Gabetto, Mazzola, Ferraris, Menti. Più de tuti me piaseva Valentino Mazzola che iera el capitano e el zogava de mezzala ma anche Menti e Gabetto, atacanti iresistibili. Purtropo nel 1949 el roplan che portava indrio del Portogallo questa grande squadra, dopo l’incontro con el Benfica, el xe andà a sbater contro la Basilica de Superga a Torino e i zogadori xe tuti morti. Me ricordo, quando che go sentì la notizia per radio, no ghe podevo creder e go pianto per diversi giorni.

Andando avanti coi ani, gavevo pensà de diventar zogador anche mi. Mio papà el gaveva zogà de giovane con el "Grion" e el contava sempre de quela volta che el gaveva fato gol squasi de metà campo. Mi no so se iera vero ma mio papà iera anche pescador e alora, penso che, come che el slongava quando che el contava dei pessi, cussì forsi el slongava anche per el gol. Indiferente, mi gavevo scominzià a zogar e iero anche bravo a "scapolar" (a driblar, come che i disi adesso) ma gavevo el problema de tirar in porta. Mi miravo la porta ma la bala la andava sempre de qualche altra parte. Presto me son guadagnà el nome de "Gambalessa" e alora go lassà perder.

Roberto Stanich