Istria on the Internet - People - Memories

Roberto Stanich
Ricordi

I funghi velenosi

Ve go zà contà de sior Virgilio, un sior che conossevo fin de picio e che el gaveva avù una vita aventurosa. Lui, de giovane, el fazeva el palombaro e el iera andà via de Pola con l’esodo. El iera andà in America ma, con el suo lavor, el gaveva girà tuti i mari del mondo. Quando che el xe andà in pension, el ga deciso de tornar in Italia, insieme con la moglie, siora Lisetta. El se ga stabilì a Trieste e de là el vigniva avanti e indrio de Pola, dove che el se gaveva messo a posto una casetta.

Iera una bravissima persona ma, purtropo, coi ani, el iera andà, come che se disi, un poco in dolze. Gnente de grave ma ghe iera vignude certe manie, come quela dei funghi. Oh Dio, andar a zercar funghi no xe una mania, xe una passion e anche mi la go ma, quela del sior Virgilio, iera proprio una mania.

I xe bioni tuti, anche quei «cinesi»

Lui el sosteneva che, praticamente, tuti i funghi xe boni de magnar e solo pochissime qualità xe velenose. Cussì, quando che, in stagion, de autuno, el andava a zercar funghi, lui ingrumava de tuto. Mi ghe disevo de star atento, perché un avelenamento de funghi pol esser assai pericoloso e ghe racomandavo de far controlar i funghi dei esperti che xe in mercato, prima de magnarli. Ma lui me rispondeva che no ghe iera altri più esperti de lui. Che lui gaveva ingrumà funghi in Cina, dove che cressi ‘sto famoso “fungo cinese”, in Messico, dove che la gente del posto magna un fungo che te dà le alucinazioni, come la droga e in ogni altra parte del mondo. A casa, lui gaveva diversi libri che catalogava tuti i funghi e el saveva a memoria i nomi in latin dele varie qualità.

A mi, però, ‘sta roba no me convinzeva e cussì, quando che semo andai insieme a zercar funghi, quel’ ano. che se ierimo trovai a Pola in otobre, ghe go racomandà: “Sior Virgilio, no la stia magnar tuti quei funghi che la ga ingrumà, che me par de gaver visto che la ga in borsa anche dele amanite, che le xe velenosissime, se mori, se no se intervien in tempo. Gavemo trovà bastanza funghi boni, porcini, prataioi, quei giali che i ciama galeti o anche finferli. La magni quei che semo sicuri che i xe boni, se la vol ghe dago anche i mii, che noi no bazilemo tanto”. Ma lui no ghe ne gaveva volù saver: “El misto xe assai più bon” – el gaveva dito – “e po, no stà preocuparte perché, prima de magnarli mi, ghe fazo assagiar i funghi ala gata de mia moglie e se i ghe fa mal a ela, noi no li magnemo”.

“Speremo in ben” me son dito e son andà a casa che, quela volta, iero ospite de mio zio, che el stava là vizin. Però, no iero tranquilo e me iera passada la voia de magnar i funghi che gavevo ingrumado mi. Cussì, li go netadi e li go messi a sugarse che sechi i xe ancora più boni a farli con el risoto, de inverno. Dopo zena, go ciacolà un poco con mio zio e po’ son andà a dormir, che iero stanco del caminar che gavevimo fato.

Una note poco tranquila

Ma no iera destin che fussi una note tranquila. Verso le due dopo mezanote se gavemo sveià, che sentivimo qualchedun che bateva forte sul porton e che ciamava. Son andà a verzer e chi iera? Sior Virgilio, in pigiama, con i oci fora dele orbite e palido come un morto. Drio de lui, siora Lisetta, palida anche ela, come una strazza e con i cavei impirai sula testa.

“Sior Virgilio, siora Lisetta, cossa xe, cossa xe sucesso?” Ghe go domandà subito. “I funghi, i funghi”, ga risposto lui. “Come i funghi?” Ghe go domandà ancora: “Ve ga fato mal? Sentì dolori in panza?” “No, no, no gavemo dolori, ancora, ma la gata…. la gata.” “Cossa la gata?” “La gata la ga magnà i funghi e la xe stada mal, la se rodolava per tera, la pianzeva e la ga butà fora…”

“E alora vol dir che i funghi iera velenosi e che staremo mal anche noi. Bisogna andar subito in ospedal, portine presto ti con la machina al pronto socorso”. “Va ben, no ste spaventarve, ve porto subito” ghe go risposto.

No me son gnanche vestido, go messo solo el giacheton sora el pigiama, le scarpe, li go carigai sula machina e via al pronto socorso. Semo rivai che sior Virgilio e siora Lisetta i pareva più morti che vivi. El dotor xe vignù subito a domandar cossa che i gaveva e mi ghe go dito che i gaveva magnà funghi probabilmente velenosi. “Che qualità de funghi?” Ga domandà el dotor. “De tute le qualità” – ghe go risposto mi e iera vero, perché sior Virgilio el ingrumava de tuto.

La lavanda gastrica

“E, alora bisognerà far una lavanda gastrica” ga concluso el dotor. “la ga magnà ‘sti funghi anche lei ?” El me ga domandà ancora. “No, no, mi no li go magnai” go risposto subito, prima che el dotor decidi de farme qualche tratamento anche a mi.

Xe rivai i infermieri, i ga carigà ‘sti poveri sior Virgilio e siora Lisetta in barela e li ga portai in un’altra camera. Dopo un poco, se ga scominzià a sentir rumori come de quando che se sta mal de stomigo e mi son andà fora in giardin per no star mal anche mi..

I li ga tignudi drento per squasi un’ora e quando che i li ga portà fora i fazeva ancora più impression de prima. Adesso, i iera de color olivastro, labri lividi, sotooci neri e oci de pesse lesso. Sior Virgilio me ga riconossù e el me ga fato un gesto con la man, come per dir “che mal che stago”. Siora Lisetta, inveze, la gaveva serà i oci e la pareva morta. Son andà a zercar el dotor per domandarghe se i li trategniva in ospedal. Lo go trovà che el stava medicando uno che iera cascà con la moto e el se gaveva sbregà meza orecia. “El me scusi dotor”, ghe go domandà, “i mii amici li tratien in ospedal?” “Chi, quel dei funghi?” El me ga risposto “no, no, li porti a casa, no gavemo posto e po’ no podemo farghe altro, dopo la lavanda gastrica no i gaverà conseguenze”.

Lo go ringrazià e son tornà all’acetazion. Sior Virgilio se gaveva ripreso un poco, “andemo a casa” ghe go dito. “Ah sì?” El me ga risposto: “Meno mal, gavevo paura che i ne tegni drento”. Po’ el ga agiunto “Chisà la gata, povera bestia, se la sarà zà morta o ancora in vita.”

La sorpresa dela gata

Come che Dio vol, li go carigadi in machina e semo tornai a casa. Sior Virgilio me ga dà la ciave e go verto la porta. Go impizzà la luce e subito gaavemo sentì un “MIAOOO” forte. Sul divano ghe iera la gata con quatro o cinque gatini apena nati. “Sior Virgilio”, go zigà, “la gata la stava mal e la ga butà fora perché la gaveva de partorir, no perché la gaveva magnà i funghi. I funghi iera boni, no se gavevi avelenà”. “Ah no? “ El ga risposto “ma varda che bestia malegnaza, per colpa sua gavemo dovù andar in ospedal e farse far quel tratamento che, ancora adesso me fa vignir el voltastomigo solo a pensarghe. No voio gaver mai più gati” . “Varda che no xe colpa dela gata”, xe saltada su siora Lisetta, “ma tua, che ti ingrumi tute quele porcherie de funghi. Mai più funghi!”

“MAI PIU’ GATI!” “MAI PIU’ FUNGHI!” “MAI PIU’ GATI….

“Se i discuti cussì, vol dir che i sta ben”, go pensà e, alora, li go saludai e son andà via. “Tra moglie e marito non mettere il dito”, xe el deto.

Roberto Stanich

Ristampato da:

Ciacolade, La Voce del Popolo, 9 luglio 2005.

Main Menu

This page compliments of Roberto Stanich