|
|
|
Le luganighe domace Ve go zà contado in un’altra ciacolada del pan de l’Istria ma anche le luganighe le xe importanti nei mii ricordi de infanzia. Quando che iero picio in Istria no iera frigider e, anche se el ghe fussi stà, no iera roba de meter drento. Cussì, quando che rivavo de improviso de mia nona in paese, quel che iera disponibile subito e che la me podeva far iera ovi in fritaia con una luganiga. Ela, povera, la tigniva el porco, che xe lavor a tenderlo, a farghe de magnar, a curarlo che nol se amali, tuto per far qualche persuto, un poco de lardo e luganighe per i fioi e i nipoti. De sicuro xe anche la mia imaginazion ma ‘ste luganighe le iera un qualcossa de grande. Mi sento ancora ogi el profumo de come che le se friseva coi ovi e, andando avanti coi ani, go fato diversi tentativi per trovar qualcossa de simile ma con pochi risultati. Anche in Istria xe dificile trovar luganighe compagne, perché el becher no le fa cussì bone e, chi che le fa in casa, el se le tien. Mio zio, el afarista, el me gaveva dito che me le procurava lui ma, dopo la storia de l’agnel de Pasqua, no me fidavo più. In Italia mi go provà a magnar diversi tipi de luganighe, mantovane, toscane, calabresi, furlane, le xe anche bone, fate sula gradela, con la polenta, coi capuzi ma nissuna passa la prova dela fritaia, se fazo el confronto con quele de mia nona in Istria. Go provà anche in giro per el mondo. A Monaco in Germania xe ristoranti specializadi in roba de porco, che i gnochi sai i magna. Go provà a magnar un piato tuto de luganighe, de un dieci tipi diversi, bianche, nere, grosse, fine. Xe un piato forte, che fa pieneza ma gnente de far con le luganifìghe de mia nona. Go provà a Viena, dove che xe ‘ste famose luganighe de Viena, che po’ lori i le ciama Frankfurter, de Francoforte, go provà in Inglitera e in America, dove che se magna luganighe con panzeta frita e fritaia ala matina presto, per colazion ma in nessuna parte ‘ste luganighe iera come quele de mia nona in Istria. Fina che, una volta che iero andà a Pola, passando vizin una becheria, go visto luganighe in vetrina con sora scrito “klobasice domace” che vol dir luganighe nostrane. Me son subito incuriosì, son andà drento la botega e ghe go domandà al becher che tipo de luganighe che xe quele. El me ga risposto che xe luganighe domace, nostrane, come che femo noi in Istria. “Bon”, me son dito, “varda che forsi go trovà le luganighe che zercavo” ma, istesso no me fidavo tanto, cussì ghe go dito de darme solo un kilo, che le proverò. El me le ga ben incartade e mi le go portade a Milano. Come che son rivado a casa, mia moglie, che la xe sempre un poco sospetosa, la me ga domandà “cosa hai comperato?” “salsicce” ghe go risposto. “E occorre andare fino a Pola per comperare salsicce?” la ga dito ancora. Mi no go risposto gnente ma go pensà tra de mi“ti vederà cossa che ti magni, se xe quel che intendo mi. ” E, dito e fato, go messo la fersora sul gas, go taià due luganighe a tochi e le go messe a friser. Subito go sentì quel profumo che me ricordavo e son stà sicuro che el becher no me gaveva imbroià. E infati, ‘ste luganighe le iera bone, ma cussì bone che le gavemo finide in pochi giorni. Finide che le gavemo, spetavo con impazienza de andar ancora a Pola per far una bona scorta. E, dopo un poco de tempo, me xe capità de andar ancora, insieme con mia moglie, che ierimo invitai a un matrimonio. No podevo fermarme tanto perché gavevo impegni de lavor ma, prima de partir, go trovà el tempo de andar de novo in ‘sta becheria. Come che son rivado drento, ghe go dito al’omo de darme 5 kili de luganighe domace. El becher no iera quel de la prima volta e el me ga vardà mal squasi, che ghe porto via tute le luganighe. El ga dovù andar nel retrobotega e in tel frigider, quel grande e ingrumar tute le luganighe che iera drento. El me ga fato un paco e go speso anche tanto ma no me importava, volevo esser sicuro de gaver abastanza luganighe per un poco de tempo. Go messo el paco con le luganighe in tel baul dela machina, son andà a cior mia moglie e semo partidi per Milano. Dopo un poco che andavimo, se ga scominzià a sentir un odor de luganighe drento la machina e mia moglie me ga domandà “cos’è questo odore, cosa hai messo nel baule?” “ma niente” ghe go risposto “un po’ di salsicce” “ ma quante salsicce?” “ 5 kili”. “Come al solito sei esagerato” la me ga dito “dove metteremo 5 kili di salsicce?” “nel surgelatore” ghe go risposto. La ga scorlà la testa ma no la ga dito più gnente. Però ‘sto odor de luganighe diventava sempre più forte e, dopo un poco, go dovù fermarme perché a mia moglie ghe vigniva mal. Go provà a involtizar meo el paco dele luganighe con sacheti de nailon ma, istesso l’odor iera forte e gavemo fato el resto del viagio con i finestrini verti. Finalmente, come che Dio vol, semo rivai a casa a Milano e mia moglie, stanca del viagio e de l’odor dele luganighe, la xe andada in leto. Alora mi go serà ben la porta dela cusina, go ciolto fora la fersora, go taià a tocheti due luganighe e le go messo messe a fizer sul gas. Ma, dopo un poco…. disillusion: el profumo no iera quel che me ricordavo e le luganighe no iera come quele dela prima volta. Mi no son bon de dir cossa che iera de diverso ma iera diverso. E cussì, le luganighe xe finide in surgelador e, dato che no le magnavimo, mia moglie la ga scominzià a darghele al can, che no ghe importava gnente se le iera domace, nostrane, istriane o cossa e per lui le iera bone tute. Mi, inveze, ancora adesso ogni tanto penso a cossa che ghe mancava, cossa che iera quel profumo che ghe mancava….forsi el profumo de l’Istria e dela nostalgia. Roberto Stanich Source:
|
|
This page compliments of Marisa Ciceran and Roberto Stanich Created:
Saturday, January 08, 2005; Last updated: Saturday, June 23, 2007
|
