|
|
|
Pasqueta in Bosco Siana Le feste come Nadal e Pasqua iera sempre assai sentide dala nostra gente. Iera l’ocasion per ritrovarse insieme in famiglia, con i parenti, con i amici, far dele bele magnade, star in alegria, contarse storie de robe de una volta, ricordar insieme quele persone care che non le xe più con noi, sentirse boni e generosi almeno per un giorno o due al anno. Ma el modo de viver cambia e i giovani, specialmente, i xe sempre meno ligadi ale tradizioni. Xe forte la tentazion de aprofitar dele feste per far qualche bel viagio, veder el mondo, conosser gente nova. E, d’altronde, l’oferta no manca, e le possibilità, grazie a Dio, le xe assai più bone de una volta. E, alora, le tradizioni passa in seconda linea, se zerca de viver nel modo più bel possibile giorno dopo giorno. “Carpe Diem” gaveria dito el mio amico Bepi barbier, dela via Medolin, che nol gaveva studià latin ma el iera un grande filosofo. Indiferente, no xe mia intenzion criticar i modi de viver dei giovani de ogi, ma de contarve come che vivevimo le feste noi, co’ iero mi mulo a Pola. Pasqua iera una festa grande che se passava in famiglia e se la passava per la stragrande magioranza del tempo a tavola. La gente gaveva ancora el gusto de magnar ben e le done de casa lavorava tuta la setimana per prontar el pranzo de Pasqua. Iera de procurar e far l’agnel, far le pinze, i fusi, le titole e i ovi per i fioi. E tra Pasqua e Pasqueta bisognava far fora tuto quel che se gaveva prontà, che iera pecà de Dio strazzar o butar via quel che restava. A Pasqueta, inveze, iera tradizion de far una gita, un pic-nic, come che se disi adesso, in bosco Siana. Per chi che no xe de Pola, el bosco Siana xe un belissimo bosco poco fora cità, sula strada per Fiume, prima del campo de aviazion de Altura. E in questo bosco per Pasqueta, se iera bel tempo, passava la giornada in alegria squasi tuta la cità. Iera clape de muli e mule, famiglie, compagnie de amici che fazeva festa, i magnava, i beveva, i giogava, i scherzava, i rideva e, ala sera, i tornava a casa cantando, stanchi ma contenti. Mi me ricordo che andavimo in Bosco Siana con mia mama e mio papà e altre famiglie de amici fin de quando che iero picio, picio, subito dopo la guera. La gente sperava de gaver finì de patir e tuti gaveva voia de divertirse. Noi fioi giogavimo tuti insieme, le done ciacolava, i omini i giogava a carte o, quei più giovani, a balon. Qualchedun, dopo la magnada, el se distirava sul prà, in ombra, soto un albero e el se fazeva una bela dormida. Come ve disevo, noi muleti andavimo tuti i ani con le nostre famiglie ma, quando che semo rivai verso i 14-15 ani non volevimo più star insieme con i “veci”. Gavemo fato la nostra compagnia de muli e de mule e, con le prime simpatie, i primi inamoramenti, volevimo star de soli, esser indipendenti , se sentivimo ormai “grandi”. Cussì, me ricordo de quel ano che gavemo pensà de andar per Pasqueta in Bosco Siana soli, con la nostra compagnia de giovani, senza mama e papà e parenti, soli noi muli e…mule, se intendi. Gavemo organizà tuto, el magnar, el bever, chitara e fisarmonica, per sonar e cantar, tuto pronto, sperando solo che vegni bel tempo. E el tempo ne ga contentà, xe vignuda una bellissima giornada de primavera. Solo che, al ultimo momento, xe saltà fora qualche problema: i genitori dele mule no iera tanto contenti de questa nostra idea, no xe che no i se fidava… ma, cossa gaveria dito la gente de ‘ste putele che le va in giro de sole con i muli…in bosco? No xe una bela roba! Cossa volè, iera altri tempi, no iera la libertà che ga ogi i giovani, se iera prigionieri dele convenzioni. Ma, dopo un poco de tira e mola, pianti, promesse de far le brave, de tornar a casa presto, de no darghe tanta confidenza ai muli, i genitori le ga lassade vignir. E cussì xe cominciada la nostra più bela Pasqueta. Se gavemo trovà ai Giardini verso le 10 de matina e de là tuti insieme, se gavemo incaminà verso el Bosco Siana. Beata gioventù senza pensieri, ridendo e scherzando semo rivadi sul posto in un atimo. Se gavemo sistemà soto un grande albero, metà in ombra metà al sol. Gavemo messo zò sull’erba tovaie e coverte e le mule ga prontà el magnar che gavevimo portà de casa: agnel impanado, luganighe, persuto, ovi duri e in fritaia, con pan fato in casa e pinze. Per bever, oltre che l’aranciata, noi muli gavevimo procurà de scondon anche un per de fiasche de vin. Che magnada! Gavemo fato a gara a chi che magna e bevi de più e quando che non ne stava più gnente in panza, se gavemo messo a giogar: palla prigioniera, mosca cieca, i pegni…. dire, fare, baciare, e, dopo, a cantar le nostre canzoni. Co’ se gavemo stancà de giogar, le mule le ga lancià l’idea de andar in bosco a ingrumar violete, che le xe cussì bele e le ga un profumo delicato. E noi muli: sì, sì, che bel, andemo, andemo. Ma ghe iera un poco de interesse de parte nostra, perché gavevimo tuti le nostre simpatie e speravimo che in bosco, dove che xe più facile isolarse, podessi nasser qualcossa, magari qualche baseto, de scondon dei altri. E cussì semo andadi. Anche mi gavevo la mia simpatia, iera una muleta che la me piaseva, i lo saveva tuti, fora che ela perché no gavevo mai avù el coragio de dirghelo. Ma, forsi, la doveva gaver imaginado qualcossa, perché, intanto che la ingrumava ‘ste violete, ogni tanto la me dava qualche ociada. Mi ghe andavo drio, spetando el momento giusto per dichiararme e, una violeta qua e una là, andavimo sempre più drento el bosco. Mi continuavo a pensar: “Adesso ghe digo che la me piasi”, ma no trovavo mai el coragio de parlar. A un certo punto, intanto che ierimo in una radura, nel silenzio del bosco, gavemo sentì un grande rumor come de rami de albero che se rompi. La mula se ga spaventà e, de istinto, la me se ga butà in brazo; mi go guardà verso dove che vigniva el rumor e, cossa iera? Un cervo, grande, bel, con i corni grandi, i oci dolci, fermo che el me vardava. Xe stà come un momento magico, el tempo che se ferma: el bosco con i alberi frondosi, i ragi del sol che se infiltra tra le foie, un spichio de ciel azuro , l’erba verde, el profumo dele violete, la mula in brazo, el cervo che me guarda. Ga durà poco, xe rivadi i nostri amici e el cervo el xe scampà dove che el bosco iera più fisso. L’incantesimo se ga roto e no me ricordo altro de quel giorno. Dopo tanti, tanti ani, via de Pola, go incontrà per caso quela muleta, che no la iera più muleta come mi no iero più el mulo del bosco Siana. Al momento, me son trovà imbarazzado, ma la mula de una volta la me ga messo subito a mio agio. “Ti te ricordi”, la me ga dito, “de quela volta del cervo?”. “Sì, sì, me ricordo” e zò una ridada. Ma, quando che la go saludada, ghe go visto in tei oci che la gaveva anche ela un forte ricordo de quel momento magico. E, ancora ogi, ogni tanto penso a quel bosco, ai ragi de sol tra le foie… al profumo de violete, al cervo che me guarda… Roberto Stanich Source:
|
