Istria on the Internet - People - Memories

Roberto Stanich
Ricordi

«Ma l'amore no» da Oltre l'amore (1942)

Quando Gigi 'scoltava «Ma l'amore no»

El giorno 22 aprile del 2006 ga lassado el nostro mondo la signora Alida Maria Laura Altenburger von Markenstein [e] Freunberg, famosa atrice de cinema, teatro e television, nata a Pola el 31 maggio 1921, conossuda con el nome d’arte de Alida Valli. Quando che go leto questa triste notizia sul giornal, de colpo me xe vignù in amente una canzon, una bela canzon che la signora Valli la cantava nel film “Stasera niente di nuovo”, girado nel 1943:

"Ma l’amore, no
l’amore mio non può
disperdersi nel vento, con le rose
Tanto è forte che non cederà
non sfiorirà…"

Mi, veramente, no go mai visto el film, ma la canzon la go scoltada tante volte, indovinè dove? In tela bottega de barbier del mio amico Gigi a Pola.

Gigi iera una bonissima persona e un bravo barbier ma el gaveva un mania, lui el iera inamorà, perso, dela Alida Valli. Intendemose, el suo iera un amor pretamente platonico, perché la Alida gnanche no la conosseva. Per la verità, una volta la gaveva vista, quando che la iera ancora puteleta picia e la stava a Pola. Lui, quela volta, el lavorava de garzon in te la botega de sior Bepi e un giorno el gaveva visto passar ‘sta bela muleta insieme con suo papà. Sior Bepi el gaveva saludà: “bongiorno professor!” E, dopo, el ghe gaveva dito a Gigi: “quel xe el professor Altenburger che el compagna la fia a scola, la xe proprio una bela picia.” Gigi se ricordava de ‘sto episodio ma no el riussiva a colegar la figura de ‘sta muleta con quela dela famosa atrice; in efeti, lui se gaveva inamorà de la Alida, solo vedendola in cine. Gigi gaveva visto tuti i sui film e anche più de una volta, tanto che el saveva le storie a memoria. Se ti ghe domandavi, per esempio: “Gigi, come xe la storia de Oltre l’Amore? Lui te contava tuto per fil e per segno e el se ricordava anche le parole dele scene più importanti, specialmente quele de amor. Ma, indiferente, ve disevo che scoltavo questa bela canzon in botega de Gigi perché lui là el gaveva un gramofono, de quei antichi, ancora con le puntine e la manovela e, el più dele volte, el meteva su el disco dela Alida. Altre volte, el usava cantarla lui, intanto che el taiava i cavei. Iera ancora più bel a sentirlo e vederlo quando che el fazeva la barba. “Ma l’amore no…”, el cantava, e zò una penelada, “l’amore mio non può..” e zò un’altra penelada. A veder i gesti che el fazeva, iera come un baleto. Ma, quando che el ciogheva in man el rasador, el smeteva subito, perché xe un lavor de precision e bisogna esser concentradi, che, se te sbrissa la man, ti va a finir in disgrazia.

Gigi non solo el andava in cine a veder la Alida, lui se tigniva informado dela sua cariera anche legendo tute quele riviste che parlava de ‘sti artisti famosi, come Amedeo Nazzari, Assia Noris, Isa Pola e altri. Ma la sua preferita “l’Innamorata di Sempre”, come che lui la ciamava, iera Alida. La botega iera tapezada de sue fotografie, che Gigi distacava dele riviste, e de placati dei sui film. I clienti lo ciogheva un poco in giro per questa sua mania ma senza cativeria, perché lui iera un bon omo e, in fondo, nol ghe fazeva mal a nissun. Anzi, iera un bel argomento de conversazion per i clienti, bastava dir el nome de Alida e Gigi partiva in tromba a contar la storia de l’ultimo suo film, de come che la iera brava, bela, de come che la recitava ben.

Chi che no iera tanto contenta de questa mania de Gigi, iera sua mama. Gigi gaveva zà una certa età e sua mama la voleva che el se sistemi, che el sposi una brava dona, no importa se no la xe tanto bela, ma che no la gabi grili per la testa. Gigi, però, nol voleva saverghene, lui, el diseva, el iera inamorà dela Alida e nol voleva sposar nissuna altra dona.

Xe passai i ani, xe finida la guera, xe rivai i Inglesi e i Americani e, dopo un poco, i Druzi, Pola xe passada soto la Iugoslavia. Tanta gente xe andada via con l’esodo, in Italia e in giro per el mondo. Gigi xe restado a Pola, sempre in te la sua botega piena de fotografie de Alida Valli. Ma, adesso, iera più dificile coltivar la sua passion. In cine i fazeva squasi sempre film de guera de partigiani e, quei pochi film italiani che rivava, iera quei “neorealisti”, che i fazeva veder come che xe miseria in Italia. De Alida che, intanto, i la gaveva ciamada a Hollywood, gnente. Fina che xe rivà in cine Nazionale che, adesso, el se ciamava Beograd, “Il Terzo Uomo” , “Treci Coviek” in croato, el famoso film girado a Viena con Orson Welles. Gigi xe andà a vederlo per tre volte, fazendo la fila tre volte per ciapar el biglieto ma non iera come i film che lui iera abituà a veder. I parlava in Inglese e, soto, iera le scrite in Croato. Gigi no capiva nissuna dele due lingue e el se contentava de vardar la Alida.

Dopo, per un pochi de ani, gnente. Iera dificile de trovar anche le riviste de cine. Un amico de Gigi, che iera andà in Italia, ghe mandava ogni tanto riviste vecie ma i pachi rivava e no rivava e a Gigi i ghe ga fato capir de star atento, che el poderia gaver dispiazeri, con tuti ‘sti giornai de propaganda che el ciapa de l’Italia. Anche in botega, i ghe ga dito, tignir tute quele fotografie de film revanscisti, capitalisti, imperialisti xe un ofesa per el popolo lavoratore e per la società socialista e che saria meo che li tiri via. Sua mama lo tazzava che saria ora che nol pensi più a quele monade che el ga per la testa, che nol xe più un muleto, che el se sistemi, che el sposi una brava dona. Tramite una sua comare de Medolin, la ghe gaveva anche trovà una vedova, un poco avanti coi ani, ma brava. Gigi, però, no ghe ne voleva gnanche parlar.

Iera el 1957, quando Gigi xe vignù a saver che la Alida la girava un film intitolado “La Grande Strada Azzurra” in Istria. Lui no ghe ga pensà sù due volte, el ga serà la botega e, via ,con la coriera, prima a Parenzo, dopo a Orsera e, al fine, a Umago, dove che finalmente el ga trovà la troupe del film. Ma, purtropo, nol ga podù gnanche avicinarse, perché iera pien de Milizia e no i lassava passar nissun. Lui, alora, el ga pensà de qualificarse come giornalista ma i lo ga becà subito. I lo ga portà al comando e i ghe ga fato un bel interogatorio. Che cossa che el fa là cussì lontan de Pola, che perché el se ga qualificà come giornalista che,inveze, el xe barbier, che chi lo ga mandà, che cossa el voleva far, qualche sabotagio? Lui rispondeva sempre “Alida… volevo veder la Alida” e, ala fine, questi che lo interogava i se ga stufà e i lo ga rispedì a Pola, con divieto de lassar la cità.

Dopo de quela volta, Gigi no xe stà più el stesso, el ga perso l’interesse per el cine e el ga acetà de sposarse con ‘sta vedova che ghe gaveva procurà sua mama.

Xe passà tanto tempo e un ano, che son tornà a Pola, i me ga dito che Gigi nol sta ben, che el ga un bruto mal. Go provà un grande dispiazer e go pensà de andarlo a trovar. La botega iera serada e, cussì, son andà a casa sua. El stava in un quartierin a Castagner. Go sonà ala porta e me ga verto una dona de meza età. Questa devi esser la moglie, go pensà, la vedova che ghe ga trovà sua mama. La dona la me ga vardà con un poco de sospeto, “chi la zerca?” la me ga domandà. “Zerco Gigi, el barbier” ghe go risposto, “son un suo vecio amico”. La me ga fato entrar e la me ga acompagnà in una cameretà. E, là, distirado su de un divano, iera Gigi. Povero Gigi, se no savevo che el iera lui, no lo gavessi riconossù. El iera diventà magro, palido, el gaveva perso anche i cavei. Come che el me ga visto “Berto” el me ga dito “Che piazer vederte”. Me son sentado vizin e gavemo scominzià a parlar. Lui se lamentava che el stava mal, che el iera stufo, che i dotori no ghe dava le medicine giuste. Mi zercavo de cambiar discorso e, a un certo punto ghe go domandà “E con la Alida, come va, ti ghe pensi ancora ?” Ghe se ga iluminà i oci, “speta” el me ga risposto. El se alzà con fadiga , el xe andà a verzer un cassetin e el ga tirà fora una grande fotografia. “Varda, la me la ga mandada ela” el me ga dito. E infati sula fotografia iera scrito in bela caligrafia:

"Al mio fedele ammiratore Gigi, con tanto affetto, Alida Valli".

“Quando che moro”, el ga continuà, “perché so che morirò presto, voio che i me meti questa fotografia in tela cassa con mi”.

L’ano dopo son tornà a Pola e go savù che Gigi iera morto. Son andà a trovar la moglie e ghe go fato le condoglianze, ma no go trovà el coragio de domandarghe se la ghe gaveva messo la fotografia dela Alida insieme con lui in tela cassa.

Oggi, forsi, Gigi poderà finalmente coronar el suo sogno de incontrar l’amata Alida Valli nell’aldilà.

Roberto Stanich

Tratto da:

La Voce del Popolo - http://www.edit.hr/lavoce/060506/esuli.htm

Main Menu

This page compliments of Roberto Stanich