Vela, che passione!

Co' iero mulo a Pola, a scola gavevimo el professor Volghieri che el iera un velista e al sabato el ne portava a Vargarola, dove che i tigniva le barche dela "Vega" la società velica de Pola. Là mi go scominzià a andar in barca e a inamorarme dele barche a vela. Le prime volte che andavimo, de inverno, i ne ga messo a gratar via la pitura dele barche in tera. Dopo, bisognava meter la stoppa tra le doghe, che quela volta le barche le iera tute de legno e no de plastica come adesso. Dopo ancora, se le meteva in acqua per far dilatar el legno e assicurar la tenuta e, ala fine, se le piturava, in bianco sui fianchi e con la pitura antivegetativa rossa la parte immersa.

La coperta iera in legno de Tek e, dopo gaverlo ben lucidà con la carta de vetro, quela fina, ghe passavimo la cera.

Se ghe penso, sento ancora oggi quel odor de legno e de pitura, misto con l'odor de mar, odor tipico de quei pochi cantieri che i fa ancora barche de legno. Come barche gavevimo le "Iole" che adesso i ciama "Finn", le "Stelle", che adesso i ciama "Star" e un "Dragone", che no so se xe ancora una categoria olimpica e come che i la ciama.

Quando che xe vignuda la bela stagion, gavemo scominzià a andar in mar ma mi iero ancora picio e no i me dava una barca per andar de solo e cussì dovevo spetar che qualchedun dei muli più grandi me cioghi come mozzo prodier. Me piaseva tanto bordisar con la Stella che bastava un fil de vento e 'sta barca la filava via lissa come sul'oio e se sentiva solo el sciabordio de l'acqua soto la barca. Opur, quando che iera maestral forte o anche bora che se dovevimo butar fora bordo e far contrapeso per non incapelarse (scuffiar come che i disi adesso). A quei tempi iera famoso Agostino Straulino che el iera de Lussin e el gaveva vinto la medaia de oro per la classe Star ale Olimpiadi de Helsinki nel 1952. Mi sognavo de far le regate e de diventar famoso come lui.

Le prime uscite le gavemo fate nel porto de Pola, drento la diga foranea. Andavimo de Vargarola fino torno dele isole de San Andrea e Santa Caterina ma no se podeva andar vizin perché iera zona militare e el druze col sciopo el zigava "Stoj". Con l'estate inveze se ga scominzià andar fora dela diga fina a Stoja, Valcane, Sacorgiana. Bordissavimo soto costa, vizin i bagni per farse veder dei amici e dele mule.

Purtropo, mi iero muleto e, come mozzo, no gavevo nissuna autorità in barca e cussì, non apena el mulo più grande el combinava de portar fora qualche mula, el me scarigava in tera e dovevo tornar a casa a pie. Mi me rabiavo come un mato ma no podevo far gnente e me sognavo de quando che gaveria podù gaver una barca a vela mia.

Presto gavemo dovù lassar la nostra Pola e, dopo un poche de peripezie, se gavemo stabilì a Milano. Bela città, per carità, grande, i Milanesi brava gente, tante opportunità de lavor ma no xe mar! E mi sempre a pensar a 'sta barca a vela e a diventar mato quando de estate se tornava a Pola e vedevo 'sti muli che bordissava.

Me iero apena sposà, gavevo fioi pici e no iera grandi disponibilità de schei, per la barca po', a Milano! Me vigniva mal solo a pensar ai commenti de mia suocera, milanese, se me azardavo a dir che volevo comprar una barca. Ma istesso no me rassegnavo e gavevo pensà anche de farmela mi in casa ma no iera possibile perché no gavevo un posto cussì grande per lavorar. Alla fine, me xe vignuda un'idea.

Gavevo visto quei canoti de plastica per i fioi che i vendeva a poco prezo e go pensà che mi bel ghe podessi meter su la vela. Fato stà che ghe ne go trovà uno bastanza grande e lo go comprà. Prima però go inzinganà mia moglie, ghe go dito che iera una roba per i fioi, che xe bel che i impari, che anderemo vizin de tera e no xe pericolo e cussì no la ga dito gnente. In luglio, prima de andar a Pola, semo andai in montagna dove che mia suocera gaveva una casa e mi me son portà drio el canoto. Gavevo zà fato i calcoli dela vela, el baricentro, el disegno de dove che ghe tacherò la deriva, el timon, el albero e tuto el resto e come che son rivà su me son messo subito a lavorar in giardin.

'Sti montanari, quando che i passava de là, i me vardava in maniera stramba. I gaverà pensà, 'sto omo xe mato, dove el pensa de andar con la barca a vela in montagna? Ma a mi no me interessava gnente e andavo avanti e, ala fine go completà el lavor. No iera una roba fata mal ma tuto posava sula plastica e no iera tanto saldo. Comunque, me son dito, proveremo quando che rivarò a Pola.

E xe vignù el giorno che semo partidi per Pola. Go carigà tuto sula machina, che no so gnanche come che ghe stava, perché andavimo in campegio a Medolin e, oltre al canoto e vela, gavevo la tenda e tuti i strafanici che se se porta drio in queste ocasioni ma, un poco drento e un poco sul portapachi, xe sta tuto. La machina la iera piena ma questa xe stada anche una fortuna perchè no go dovù portar con noi la suocera.

E finalmente semo rivai a Medolin. Mi go trovà un bel posto soto i pini in Punta e, intando che la moglie e i fioi fazeva el bagno, go montà la tenda. Go fato una bela sudada perché la tenda iera grande e no gavevo esperienza ma go finì tuto prima de zena. Dopo, gavemo messo i fioi a dormir e se gavemo sentà de fora a vardar el mar che el sluseva soto la luna. Iera una bellezza e anche mia moglie, milanese, la ga apprezzà el posto e el spetacolo. Durante la note però, quando che xe vignù un bel temporal, la stava per cambiar idea. Per fortuna la tenda ga tignù e el temporal xe passado senza far dani.

El giorno dopo, de matina presto go tirà fora el canoto e iero ansioso de provarlo. Lo go gonfià ben e go scominzià a montar i tochi che gavevo fato per meterghe su la vela. Go bazilà con i ordegni tuta la matina ma ala fine go finì el montagio e go messo la barca in acqua. Veramente 'sta imbarcazion no fazeva tanta bela figura e la pareva come la zattera de Robinson Crusoe, con la vela fata de tochi de linzioi veci e l'albero de manighi de scova. Intanto che lavoravo, xe passadi de là anche un per de Gnochi e i se ga messo a tambascar per todesco e a rider. Mi no ghe go dà importanza. Quel che gavevo fato no iera alta ingegneria tedesca ma mi me interessava solo che funzionassi.

Dopo el temporal dela note, el tempo no iera tanto bel ma se gaveva alzà un poco de vento e mi volevo provar. Cussì go saludà mia moglie e i fioi e son partì.

Me pareva de esser Cristoforo Colombo in partenza per l'America, mancava che i me saludi sventolando coi fazoleti. Subito via de tera go ciapà el vento e la barca ga scominzìa a ciapar velocità. Mi stavo sentà de una parte, con una man tignivo el timon e con l'altra la scotta dela vela. Sentivo el vento che me tirava e el rumor del'acqua drio dela barca. Me pareva de esser al timon de un Yacht e iero al settimo cielo dela contenteza. Dopo un poco go fato una virada e el timon ga risposto. Go fato un altro bordo e un'altra virada. Iera un divertimento e via mi cussì avanti e indrio. Iero tanto ciapà che no me acorzevo de andar sempre più lontan e, quando che go visto rivar dei nuvoloni grossi gavevo passà l'isola de Fenoliga.

Go provà a girar la barca per tornar indrio ma contro vento, de bolina, no la voleva andar. Intanto 'sti nuvoloni iera rivai sora de mi, el vento se ga rinforzà e ga scominzià a piover. Procella, burasca, temporal, ciamelo come che volè, xe vignù zò el finimondo. No go podù far altro che lassarme portar del mar che ala fine me ga sbatù in tera vizin Lisignan. Mi go tirà via l'albero, go rivoltà el canoto e me son riparà soto. Per fortuna, de estate i temporai xe violenti ma i dura poco e cussì xe passà anche questo.

Ma no iera de pensar de tornar indrio con el canoto. Cussì ghe go messo drento un per de sassi e lo go ligà ben che no lo porti via el vento e son torna indrio a piedi via tera.

Son rivà ala tenda che iera zà scuro, i fioi pianzeva che i se gaveva spaventà col temporal, la moglie la iera furiosa che la gavevo lassada sola, de magnar no iera gnente perché, col pensier del marì disperso in mar, no la gaveva prontà gnente. Per fortuna la tenda gaveva tignù e almeno quel lavor lo gavevo fato ben.

Ma, dopo questa aventura, ga dovù passar tanti ani prima de gaver el permesso de comprarme una barca a vela, vera.

Roberto Stanich

Ristampato da:

• Roberto Stanich, "Vela, che passione!", La Voce del Popolo, 24 maggio 2003.